Q. Kósherbaev mereke qarsańynda analarmen júzdesti
QYZYLORDA. QazAqparat - Búgin Qyzylorda oblysynyń ákimi Qyrymbek Kósherbaev Syr óńiriniń ár salada jemisti eńbek etip júrgen áıelder qaýymyn qabyldap, merekelerimen quttyqtady.
Qabyldaý barysynda aımaq basshysy analardy marapattady, dep habarlaıdy oblys ákimdiginiń baspasóz qyzmetinen.
Otbasynyń uıytqysy bolyp, tirshiliktiń shyraıyn arttyryp júretin názik jandylar qatarynda Syr óńiriniń analar qaýymy da elimizdiń órkendeýi jolynda da aıanbaı ter tógýde. Ómirimizdiń qaı salasynda bolmasyn olar úlken eńbekqorlyq tanytyp, úı sharýasyn da dóńgeletip, qyzmetterin de qaltqysyz atqarýda. Áıel bir qolymen álemdi, ekinshi qolymen besikti terbetedi. Búgingi áıel bılik basynda erkekpen ıyq tirestirip jumys istep júr. Olar - ana, olar - jar, olar - qyz, olar - kelin. Qyzmetten de basqa qoǵamdaǵy oryndary bar. Eń bastysy, áıel qoǵamnyń teń quqyly múshesi. Qurmetke bólengen názikjandylardyń qatarynda ár salanyń ozat 30 arýy boldy.
Mereke aldyndaǵy sharaǵa Sotsıalıstik Eńbek Erleri Salıma Jumabekova men Shyrynkúl Qazanbaeva qatysty. Ár salanyń ozat áıelderi oblys ákiminiń «Qurmet» gramotasy jáne «Alǵys» hattarymen marapattaldy. Al kópbalaly Sholpan Sarıeva men Jeńiskúl Pirmaǵambetovaǵa «Altyn alqa» tabystaldy.
