Q. Kósherbaev áskerge barýdan jaltarǵandardyń tizimin BAQ-ta jarııalaýdy tapsyrdy
QYZYLORDA. QazAqparat - Búgin apparat májilisinde Qyzylorda oblysynyń ákimi Qyrymbek Kósherbaev áskerge barýdan jaltarǵandardy buqaralyq aqparat quraldarynda jarııalaýdy tapsyrdy. Bul týraly oblystyq ákimdiktiń baspasóz qyzmeti habarlady.
Qyzylorda oblysynda áskerı qyzmetten jaltarýshylar boıynsha ár apta saıyn qala jáne aýdan ákimdikterinen málimet jınaqtalyp, saraptama jasalýda. Bul tizimge kirgenderdiń sany - 606 adam.
Oblystyq medıtsınalyq komıssııa dárigerleriniń sheshimine sáıkes 606 adamnyń 383-i medıtsınalyq qaıta tekserilýge joldanyp, jıyn pýnktine kelmegen. Al, qalǵan 223-i áskerge shaqyrý maýsymy bastalǵaly izdeýde júrgender.
- Merzimdi áskerı qyzmetten jaltarýshylar jóninde ıaǵnı, Otanyn qorǵaýdan jaltarǵan azamattar týraly ótken jyly da másele kóterildi. Bıyl da osy másele taǵy qaıtalanyp otyr. Sondyqtan olardyń jáne ata-analarynyń aty-jónderi buqaralyq aqparat quraldarynda jarııalanatyn bolsyn, - dedi oblys ákimi Qyrymbek Kósherbaev.
Qyzylorda oblysy boıynsha 49 279 adam áskerı esepte tursa onyń ishinde, ártúrli sebeptermen 21 427-i shaqyrylýǵa jatpaıtyndar. Sondaı-aq, bıylǵy jyldyń qańtar-naýryz aılarynda oblys boıynsha 1999 jylǵy týylǵan 11 synypty bitiretin 5 378 azamat áskerı esepke alyndy.
Jalpy Qyzylorda oblysynan kóktemgi áskerge shaqyrý maýsymynda 743 azamat áskerı qataryna jóneltilýi tıis bolsa, qazirde sonyń 304-i áskerı boryshyn óteýde. Qalǵan 439 azamatty áskerge jóneltý jumystary aǵymdaǵy jyldyń 25 maýsymyna deıin jalǵasady.
