Q. Kelimbetov qazaqstandyqtardy páter men avtokólikterdi esepshottar arqyly satyp alýǵa shaqyrdy
ASTANA. QazAqparat - Elimizdiń azamattary páter men avtokólikterdi qolma-qol aqshamen emes, basqa joldarmen satyp alsa, durys. Bul týraly búgin OKQ brıfınginde QR Ulttyq bank tóraǵasy Qaırat Kelimbetov aıtty.
«Bizdiń oıymyzsha, iri saýdalar, máselen páter nemese kólik quralyn satyp alý qolma-qol aqshamen emes, basqa joldarmen jasalǵany durys. Eń bastysy qarajat belgili bir shottar arqyly ótýi kerek, osylaısha biz salyq organdarymen birge barlyq tólemderdi kórip otyra alamyz. Sondyqtan az ýaqyttyń ishinde osy salada birshama tııanaqtylyqqa qol jetkizemiz dep oılaımyz», - dep túsindirdi ol.
Q. Kelimbetovtiń aıtýynsha, búginde Qazaqstandaǵy barlyq tranzatsııalardyń 93 paıyzy qolma-qol tólenedi.
«Bul qazirgi kezde kez kelgen ekonomıkadaǵy soraqy jaǵdaı, nege deseńizder, barlyq osy tólemder salyqtan tysqary, kóleńkede qalady. Sondyqtan biz bul salany azdap tártipke keltirý kerek dep oılaımyz, sonymen qatar, dollarmen esepteletin baǵalardy da retteý qajet. Biz elimizdegi baǵanyń qalyptasýy ulttyq valıýtaǵa negizdeletinin sanamyzǵa ábden sińirýimiz qajet», - dep túıdi Q. Kelimbetov.
