Q. Kelimbetov Biryńǵaı jınaqtaýshy zeınetaqy qorynyń ınvestıtsııalyq saıasaty jaıly aıtyp berdi
ALMATY. QazAqparat - Búgin Almatyda QR Ulttyq bankiniń tóraǵasy Qaırat Kelimbetovtiń qatysýymen baspasóz máslıhaty ótti. Onyń barysynda bas bankır BJZQ qarjysy qaı baǵytta ınvestıtsııalatyny jaıly aıtyp berdi.
«Biryńǵaı jınaqtaýshy zeınetaqy qorynyń aktıvteri ádettegideı memlekettik qundy qaǵazdar men kvazımemlekettik sektordaǵy uıymdardyń qundy qaǵazdaryn satyp alýǵa baǵyttalady. Sondaı-aq, keı bóligi ekinshi deńgeıli bankterde 5-10 jyldyq merzimge depozıt ashylyp, soǵan salynady. Qordyń tabystylyǵyn ártaraptandyrýǵa septesetin ózge de quraldar paıdalanylady», - dedi QR Ulttyq bankiniń tóraǵasy Qaırat Kelimbetov.
Bas bankırdiń aıtýynsha, jaqynda Ulttyq bank BJZQ aktıvterin ınvestıtsııalaý týraly kontseptsııa ázirleýdi aıaqtap, keńeıtilgen otyrysta tanystyratyn bolady.
