Kell Magne Bondevık: Qazaqstan EQYU jumysynda úlken ról atqaryp otyr
«Qazaqstannyń Ortalyq Azııada da, Eýropada da, jalpy álemdik deńgeıde mańyzdy halyqaralyq ról atqarsaq degen úlken ambıtsııasy bar. Davosta ótken Dúnıejúzilik ekonomıkalyq forýmǵa Premer-mınıstr retinde qatysqa kezde men muny birden baıqadym. Sessıaılardyń birinde men Qazaqstannyń sol kezdegi Prezıdenti Nursultan Nazarbaevpen kezdesýge shaqyrtý aldym.
Aldymda óz eliniń ambıtsııasyn batyl tanystyra biletin saıası kóshbasshy otyrdy. Ol Norvegııamen jáne basqa da Eýropa elderimen tyǵyz yntymaq ornatýǵa yntaly boldy. Qazaqstannyń damý joly turaqty. Salystyrmaly túrde joǵary ekonomıkalyq ósimge qol jetkizdi dep aıtýǵa bolady. Degenmen ıgilikti neǵurlym ádil bólý jolynda áli de qıyndyqtar bar. El aımaqtaǵy qaýipsizdik pen beıbitshilikti saqtaýǵa kóp kúsh jumsaıdy. Bul Ortalyq Azııanyń basqa elderi úshin óte mańyzdy», - dep jazady ol Norvegııanyń «Vårt Land» (Bizdiń jer) gazetinde.
Saıasatkerdiń paıymynsha, terrorızm, adam saýdasy jáne energııa tapshylyǵy sııaqty synaqtardy Ortalyq Azııaǵa Qazaqstannyń yqpalynsyz sheshýi qıyn.
«Bul turǵyda Eýropa Qazaqstanmen de, búkil Ortalyq Azııamen de tyǵyz yntymaq ornatýy kerek dep esepteımin. Bul Eýropalyq Odaq úshin de, NATO úshin de úlken jaýapkershilik. Qazaqstan Eýropadaǵy qaýipsizdik jáne yntymaqtastyq uıymyna múshe jáne onyń jumysynda úlken ról atqaryp otyr. Eldiń burynǵy syrtqy ister mınıstri Qaırat Ábdirahmanov qazir EQYU-nyń az ulttar jónindegi joǵarǵy komıssary bolyp qyzmet atqarady.
EQYU burynǵy kommýnıstik elder men demokratııaǵa den qoıǵan Batys elderi úshin mańyzdy kezdesý orny boldy. Qazaqstan uıymnyń osy áleýetin tez uǵynyp, onyń aıasyndaǵy múmkindikterdi óz damýyna ońtaıly paıdalanyp otyr», - deıdi Eýropaǵa tanymal saıasatker.
