Q.Bozymbaev: 15 myń dollardyń elektromobıli shyqsa, mindetti túrde satyp alamyn
«Tesla kóligin minip kórgen emespin. Biraq, men biletin aqparat shyn bolsa, Elon Mask (Tesla elektromobılin oılap tapqan adam) 2020 jylǵa qaraı baǵasy 15 myń dollar turatyn bes adamdyq kólik shyǵarmaq eken. Ol kólikke benzın quıý úshin 500 teńge, dál sol sııaqty kólikke 5000 teńge ketetin bolsa, tutynýshy qaı mashınany tańdaıdy dep oılaısyzdar? Sondyqtan, osy kólik Qazaqstanǵa qashan keler eken dep, taǵatsyzdana kútip júrmin»,-dedi Q.Bozymbaev.
Mınıstrdiń aıtýynsha, búginde Qazaqstandaǵy Tesla ókilderiniń kóligi óte qymbat, shamamen 100 myń dollardan bastalady.
«Jýyrda, Tesla 35 myń dollar turatyn kólik usyndy. Árıne, bul da, halyq úshin qoljetimsiz mashına. Eger de elektromobılderdiń baǵasy janarmaımen júretin avtokóliktiń baǵasymen teńesse, onyń ústine, ony júrgizý úshin 10 ese az aqsha jumsalatyn bolsa, halyq osy kólikti tańdar edi. Elektromobıldiń bir problemasy bar, ol kólikti toqpen qýattaý kerek. Qazaqstan toqty qaıdan alady? Elektr qýatynyń 70 paıyzyn kómir stansalarynan alamyz. Sondyqtan, búkil álem sııaqty kómirdi órteýdiń jańa tehnologııalaryna kóshýimiz kerek », - dep tolyqtyrdy Q.Bozymbaev.
«Tesla kóligi satylady dep estigende, qarap kórgim keldi, biraq, elektromobıl satylady degen anonstan keıin nebary bir kún ishinde 350 myń adam kólik satyp alýǵa onlaın tapsyrys bergenin bildim. Meniń bilýimshe, qazir álem boıynsha mıllıonnan astam adam osy kólikti ańsap júr. Sondyqtan, kúte turý kerek. Biraq, 15 myń dollardyń elektromobıli shyǵa qalǵanda mindetti túrde satyp alamyn. Sondyqtan, 2020 jylǵa deıin kúte turaıyq»,-dedi Q.Bozymbaev.
