Q. Bıshimbaevtyń ákesi: Ulymyzda Saltanatty óltirý pıǵyly bolǵan joq

Áıelin óltirdi degen kúdikke ilingen eks-mınıstr Qýandyq Bıshimbaevtyń ákesi Ýálıhan Bıshimbaev ulynyń qasaqana adam óltirý nıeti bolmaǵanyn aıtýda, dep habarlaıdy Kazinform.

«Ata-ana retinde ulymyzda Saltanatty (Núkenova – red.) óltirý pıǵyly bolmaǵanyna senemiz. Ol onymen otbasyn qurǵysy keldi, ekeýi de birge ómir súrýdi josparlady, Saltanatqa garderobty keńeıtý úshin úıinde jóndeý jumystary júrip jatty. Ekeýi de bala súıip, tolyqqandy otbasyn qurýdy qalady. 9 qarasha kúni ne bolǵanyn ózimiz de bilmeımiz. Biraq ulymyzdyń qasaqana adam óltirý pıǵyly bolmaǵanyn taǵy da atap ótkim keledi», - dedi Ý. Bıshimbaev Youtube jelisinde «Ertisbaev Live» arnasynda.

Ýálıhan Bıshimbaev keı adamdardyń osy qaıǵyly oqıǵa arqyly ózderin jarnamalap, ádilet úshin kúresker retinde kóringisi keletinin joqqa shyǵarmady.

«Qurmetti jýrnalıster, quqyq qorǵaýshylar, blogerler jáne basqa da BAQ ókilderi! Qurmetti otandastar! Sizderden zań sheńberinde ýákiletti organdardan alynǵan senimdi aqparatty jarııalaýdy suraımyn. Jurtshylyqtan qoǵamdyq pikirge qysym jasap, tergeýge yqpal etýge múddeli keıbir adamdardyń aıla-sharǵysyna berilmeýin suraımyn. Tergeý organdarynan zań aıasynda isti obektıvti jáne tolyq jan-jaqty tergeýdi suraımyn. Men Qazaqstannyń ádil sot tóreligine, onda árbir azamattyń quqyǵy buzylmaıtynyna senemin», - dedi aıyptalýshynyń ákesi.

Buǵan deıin Ýálıhan Bıshimbaev qoǵamdyq pikirge qysym jasalyp jatqanyn, tergeý barysynda barlyq zańnamanyń saqtalýy qajettigin aıtqan edi.