Q.Bıshimbaev: Jańa baǵdarlama aıasynda 29 myń páter beriledi
ASTANA. QazAqparat - Jańa baǵdarlama aıasynda 29 myń páter beriledi. Bul týraly búgin «Nur Otan» partııasynyń QR Parlamenti Májilisindegi fraktsııasynyń jınalysynda «Báıterek» ulttyq basqarýshy holdıngi» AQ-nyń basqarma tóraǵasy Qýandyq Bıshimbaev málim etti.
«Bizderge 2015 jyly 92 mlrd., 2016 jyly 52 mlrd. teńge bólinedi. Osylaısha, Ulttyq qordan 145 mlrd. teńge beriledi. Biz osy baǵdarlama boıynsha, 2020 jylǵa deıin qarjylandyrý somasyn 250 mlrd. teńgege jetkizemiz», - dedi ol.
Onyń aıtýynsha, mundaı nátıjege jaldaý quny esebinen qol jetkiziletin bolady.
«Sonymen qatar, biz somany qaıta qarjylandyryp otyramyz. Buǵan qosa, qazaqstandyq ıpotekalyq kompanııa qor naryǵynan onyń ishinde Biryńǵaı jınaqtaýshy zeınetaqy qory aıasynan da zaımdar tartady», - dedi Q.Bıshimbaev.
Holdıng basshysynyń aıtýynsha, osyndaı sharalardyń arqasynda 2020 jylǵa deıin jalpy aýmaǵy 1,4 mln. sharshy metrdi quraıtyn 29 myń páter paıdalanýǵa beriledi.
