K. Baıseıitova atyndaǵy Ulttyq opera jáne balet teatrynyń ǵımaraty endi ne bolady?
ASTANA. QazAqparat - Kúlásh Baıseıitova atyndaǵy Ulttyq opera jáne balet teatry ǵımaratyna basqa teatr ujymy kóship barady. Bul týraly búgin Ortalyq kommýnıkatsııalar qyzmetindegi baspasóz máslıhatynda Astana qalasy Mádenıet basqarmasynyń basshysy Bolat Majaǵulov málim etti.
«Qazirgi kezda Baıseıitova atyndaǵy Ulttyq opera jáne balet teatry ǵımaratyn qalanyń balansyna berý boıynsha jumystar júrip jatyr. Ǵımarattyń ózi Astana úshin tarıhı qundylyqqa ıe jáne ol sáýlettik eskertkishter qataryna jatady. Sondyqtan da bul nysanda teatrlardyń biri qonystanatyn bolady»,-dedi ol. B. Majaǵulov K. Baıseıitova atyndaǵy Ulttyq opera jáne balet teatrynyń birqatar akterlary «Astana Operaǵa» aýysqannan keıin, qazirgi kezde ujymnyń qalǵan bóligin qyzmetpen qamtamasyz etý boıynsha jumystarmen basqarma aınalysyp jatqandyǵyn jetkizdi. «Teatr «Astana Operaǵa» jańadan ornalasqan kezde, 235 adam jumyspen qamtylmaı qaldy. Olardyń ishinde qazirgi kezde 73-i qyzmetke ornalasty, 35-i bizdiń kásiporyndarǵa qyzmetke kirdi, al qalǵandarynyń máselelerin sheship jatyrmyz»,-dep túıdi basqarma basshysy. Esterińizge sala keteıik, Qazaqstan Respýblıkasy Úkimetiniń 2014 jylǵy 3 aqpandaǵy № 43 qaýlysymen Qazaqstan Respýblıkasy Mádenıet jáne aqparat mınıstrligi Mádenıet komıtetiniń «Kúlásh Baıseıitova atyndaǵy ulttyq opera jáne balet teatry» respýblıkalyq memlekettik qazynalyq kásiporny taratylady.
