Q. Bákıevti Qyrǵyzstannan Qazaqstanǵa jetkizgen ushqyshtar memlekettik nagradalarmen marapattaldy
ASTANA. Mamyrdyń 7-si. QazAqparat /Ernur Aqanbaı/ - Qyrǵyzstannyń burynǵy prezıdenti Qurmanbek Bákıevti sol elden Qazaqstanǵa jetkizgen ushqyshtardyń birin, atap aıtqanda QR Qorǵanys mınıstrligi Áskerı áýe kúshteriniń ushqyshy - aǵa ınspektor Igor Belındi búgin Aqordada Elbasy Nursultan Nazarbaev ІІ dárejeli «Aıbyn» ordenimen marapattady,
dep habarlaıdy QazAqparat.
«Men Qyrǵyz Respýblıkasynyń Prezıdentin qupııa jaǵdaıda Jalal-Abadtan Tarazǵa jetkizý jónindegi tapsyrmany oryndadym. Sol úshin Qazaqstan Prezıdenti men Úkimeti tarapynan nagrada aldym», dedi memlekettik nagradany tapsyrý rásiminen keıin I. Belın.
Onyń sózine qaraǵanda, Q. Bákıevti Qyrǵyzstannan Qazaqstanǵa jetkizý tapsyrmasyn oryndaǵyn Qazaqstannyń Áskerı áýe kúshteriniń 4-shi bortynyń barlyq ekıpajy memlekettik nagradalarǵa usynyldy, olardyń beseýine nagradalardy keshe Qorǵanys mınıstri Ádilbek Jaqsybekov tapsyrǵan.
Aıta keteıik, sáýirdiń 16-sy kúni Aqordada bolǵan brıfıngte Elbasy N. Nazarbaev Qazaqstan Respýblıkasy Qorǵanys mınıstrliginiń Áskerı áýe kúshteriniń ushaǵy Qurmanbek Bákıevti jáne onyń otbasyn Qyrǵyzstan aýmaǵynan alyp shyǵyp, Qazaqstanǵa ákelgenin málimdegen bolatyn. «Meniń nusqaýym boıynsha elimizdiń Qorǵanys mınıstrligi Bákıevti alyp kelý úshin Áskerı áýe kúshteriniń 4-shi bortyn jiberdi. Bul másele tóńireginde qandaıda bir saıası dıvıdentter bolmas úshin aıtarym: ol Qazaqstannyń Áskerı áýe kúshteriniń ushaǵy. Bort nómiri - 04», degen bolatyn Memleket basshysy. Elbasy osy tapsyrmany oryndaı otyryp, Qazaqstannyń áskerı ushqyshtary bastaryn táýekelge tikkendigin aıta kele: «Men olarǵa alǵys aıtamyn jáne mınıstrge olardy nagradaǵa usyný úshin nusqaý berdim. Sebebi, táýekel jasaldy», dedi.
