Q.Bakıev prezıdenttik qol suǵylmaýshylyǵynan aıryldy
ASTANA. Sáýirdiń 27-si. QazAqparat - Qyrǵyzstannyń ýaqytsha úkimeti eldiń burynǵy prezıdenti Qurmanbek Bakıevti qol suǵylmaýshylyq ımmýnıtetinen aıyrý týraly sheshim qabyldady,
dep habarlaıdy RBK agenttigi. Dekret mınıstrler kabıneti basshysynyń orynbasary Ázimbek Beknazarovtyń bastamashylyǵy boıynsha qabyldandy.
Úkimet músheleri, Q.Bakıevten qol suǵylmaýshylyq ımmýnıtetin alyp tastaýǵa quqylymyz dep sanap otyr, sebebi ol, áskerge úkimetke qarsy mıtıngke qatysýshylarǵa oq atýǵa buıryq berip, Qyrǵyzstan Konstıtýtsııasyn buzǵan. Jáne olardyń Q.Bakıevtiń kináli ekendigine kúmánderi joq.
Aıta ketý kerek, burynǵy prezıdent Qyrǵyzstanda júrgen kezinde-aq respýblıkanyń jańa úkimetinen óziniń qol suǵylmaýshylyq ımmýnıtetin saqtap qana qoımaı, tóńkeristen keıin el aýmaǵyn tastap ketýge májbúr bolǵan týystaryna da ımmýnıtet berýdi talap etken bolatyn.
Dúısenbi kúni sondaı-aq Reseıdiń Qyrǵyzstannyń burynǵy ishki ister mınıstri Moldomýs Qonǵantıevti respýblıkaǵa ustap bergeni málim boldy. Eks-mınıstrge de qylmystyq buıryqtar berdi degen kúdik keltirilýde. Bul oqıǵa da eldegi jaǵdaıdy ýshyqtyryp otyr. Negizinen Qyrǵyzstannyń ońtústik-batys aýdandarynda turatyn M.Qonǵantıevtiń jaqtaýshylary Osh-Bishkek tas jolyn basyp alyp, óz jerlesterin qamaýdan bosatýdan talap etýde.
