Q. Bakıev Osh qalasynda bolǵan mıtıngiden qashyp ketti
ASTANA. Sáýirdiń 15-i. QazAqparat - Qyrǵyzstan Prezıdenti Qurmanbek Bakıev búgin tańerteń Osh qalasynda bolǵan mıtıngige keldi. Q.Bakıevtiń qala turǵyndarynyń qoldaýyna ıe bolý áreketi júzege aspaı qaldy.
Mıtıngige qatysýshylar prezıdentke sóz sóıleýge de jol bermegen, dep habarlaıdy RBK
Mıtıngige Q.Bakıevti jaqtaýshylar men onyń qarsylastary da kelgen, eki toptyń arasynda tóbeles bastalǵan. Mıtıngige 3 myńnan 5 myńǵa deıingi adam qatysqan. Biraq ýaqytsha úkimetti jaqtaýshylardyń qarasyny molyraq bolǵan. Jańa bılikti Osh oblysy basshylary da qoldady. Oblys basshylyǵy alańǵa jınalǵandarǵa «Qurmanbek Bakıevke Osh qalasynda oryn joq» dep jarııalady.
Memleket basshysynyń qarsylastary Q.Bakıevtiń kóligine shabýyl jasap, ony ustap almaq bolǵan. «AKIpress-Ferǵananyń» habarlaýynsha, prezıdent kúzetshileri adamdar tobyn buzyp kete alǵan. Sodan soń Q.Bakıev jáne onyń aınalasyndaǵylar qaladan asyǵa shyǵyp ketken.
Sońǵy kúnderi Osh pen Jalal-Abadta prezıdentti qoldaǵan mıtıngiler bolǵanyn aıta keteıik. Sonymen qatar, Qyrǵyzstannyń ýaqytsha úkimeti óziniń dekretimen Q.Bakıevti derbes quqyqtyǵynan aıyrýǵa qaýly shyǵardy. Bul rette ýaqytsha úkimettiń múshesi Ázimbek Beknazarov Q.Bakıev ózi berilmese, ony tutqyndaý úshin arnaıy operatsııa júrgiziledi dep málimdedi. Á.Beknazarov ýaqytsha úkimet osyndaı is-áreketke Q:Bakıev eldiń ońtústiginde ózin qoldaıtyn mıtıngiler júrgizip jatqandyqtan kezekti qaqtyǵystardy boldyrmaý úshin jasap otyrǵandyǵyn aıtty.
Q. Bakıevtiń ózi ózine jáne onyń otbasyna qaýip tónbeıtindigi kepildendirilse, ol óziniń prezıdenttik ókildiginen bas tartatynyn aıtty. Alaıda, sál keıinirek ýaqytsha úkimettiń tóraıymy Roza Otynbaeva úkimettiń Q.Bakıevpen kelissózder júrgizýge qarsy emestigin aıtty, biraq ta sońǵy málimetter boıynsha 80 adam qaza tapqan 2010 jylǵy sáýirdiń 7-de bolǵan oqıǵadan keıin oǵan jáne onyń otbasyna qaýip tónbeıtindigine kepildik bere almaıtyndyǵyn jetkizdi. Keshe Q.Bakıev Reseı Federatsııasynyń premer-mınıstri Vladımer Pýtınmen telefon arqyly sóılesti. Bir qyzyǵy, RF úkimeti baspasóz qyzmetiniń osy áńgimege qatysty bergen aqparatynda Q.Bakıevtiń laýazymy kórsetilmepti.
