Q.Ájibekuly - sýret óneriniń ǵajaıyp úlgisin, dara bolmysyn qalyptastyrǵan qylqalam sheberi
ASTANA. 20 aqpan. QazAqparat - Búgin elordadaǵy QR Tuńǵysh Prezıdenti murajaıynda belgili keskindemeshi, QR Sýretshiler odaǵynyń múshesi Qazaqbaı Ájibekulynyń «Asyl arman» atty jeke kórmesiniń ashylý rásimi ótti.
«Elimizge tanymal, shyǵarmashylyǵynyń ózindik qoltańbasy bar Qazaqbaı Ájibekuly óz jumystarynda halyqtyń mádenıetin, mádenı qundylyqtaryn ulttyq ıdeıasyn kórsetedi. Sondaı-aq ol kórmege Astananyń jas beınesin ashyp kórsetetin shyǵarmalaryn da qoıyp otyr. Avtor sýret óneriniń ǵajaıyp úlgisin, dara bolmysyn qalyptastyrǵan qylqalam sheberleriniń biri», - dedi kórmeniń ashylý saltanatynda atalǵan murajaıdyń dırektory Alma Saǵynǵalı.
Kórmege qylqalam sheberiniń QR Tuńǵysh Prezıdenti murajaıynyń qorynda saqtalǵan burynǵy jumystary men álemdik qaýymdastyqty tolǵandyrǵan kózqarastar turǵysynan alǵanda adamdy oılandyratyn jańa dúnıeleri, týǵan halqynyń kórkem jylnamasyn jasaýǵa umtylǵan tyń týyndylary qoıylǵan.
Q. Ájibekuly - sýretshi-monýmentalıst. Onyń kartınalarynyń basty taqyryby tarıhı mura, kóne jádigerler, uly tulǵalar beınesi men uly oqıǵalar bolyp keledi. Máselen, QR Tuńǵysh Prezıdenti murajaıy jıyntyǵynan «Jeti jarǵy» (2003 jyl) polotnasynda uly tulǵalar beınelengen. Ol Qazaqstan Sýretshiler odaǵynyń múshesi, kóptegen syılyqtardyń laýreaty. Atap aıtqanda, Á.Qasteev atyndaǵy arnaıy syılyqtyń (1999 j.), «Daryn» Memlekettik jastar syılyǵynyń (2001 j.), QR Prezıdenti stıpendııasynyń (2009 j.) jáne Memlekettik stıpendııanyń (2010 j.) ıegeri. Sondaı-aq, ol kóptegen baıqaýlardyń jeńimpazy.
