Jyl basynan beri Jambylda 2200 jańa jol belgisi ornatylǵan
Sala mamandarynyń aıtýynsha, bıyl oblys avtojoldaryna 2200 jol belgisi ornatylǵan. Jol jabyndary men qorshaýlar da qalypqa kelgen. Búginde qala ishinde 135 baǵdarsham bar bolsa, onyń 98-ine qaıta qurý jumystary júrgizildi. Mańyzdy deıtin 10 negizgi jol qıylysynda «Aqyldy baǵdarsham» jelilik baǵdarlamasy ornatylyp, kólikterdiń alty jolaqty qozǵalysy uıymdastyrylǵan. Nátıjesinde joldaǵy keptelister azaıǵan.
«Jergilikti atqarýshy organdar men prokýratýraǵa 178 aqparat joldanyp, joldy kútip ustamaı, jol qaýipsizdigin qamtamasyz etpegeni úshin QR ákimshilik quqyq buzý kodeksine saı 88 laýazymdy tulǵaǵa ákimshilik hattama toltyryldy. Kúndelikti tekseris barysynda jol belgileriniń eskirýi, maıysýy sekildi jaǵdaılarǵa qatysty jol mekemelerine uıǵarymdar berip otyramyz. Uıǵarym boıynsha belgilengen merzimde ol belgilerdiń aýystyrylýyn tekserip, qadaǵalaımyz»,- deıdi oblystyq PD ákimshilik polısıa basqarmasy jol jáne tehnıkalyq ınspeksıa bóliminiń aǵa ınspektory Erjan Dúısebekuly.
Sondaı-aq qala kóshelerinde oń jaq burylystar soǵylýda. Al, sol jaq burylystar úshin aq jolaqtar salynyp jatyr. Endi úlken jol aıyryqtaryna aq jolaqtar syzylmaq. Bul kólik qozǵalysyn rettep, tártipti túzep, qaýipsizdikti saqtaýǵa sep bolmaq deıdi mamandar.
