Jusan Bank-tiń qazirgi qarjylyq jaǵdaıy belgili boldy

ASTANA. QazAqparat – Taldaý barysynda «Jusan» tobynyń aktıvterin basqarý qurylymyn ózgertýdiń kóleńkeli shemasy anyqtaldy. Al bıyl aqpanda atalǵan banktiń keıbir aktsııalary buǵattaldy. Osy oraıda Qarjy naryǵyn retteý jáne damytý agenttigi banktiń qazirgi jaǵdaıyna baǵa berdi, dep habarlaıdy QazAqparat tilshisi.

«Jusan Bank-tiń qazirgi qarjy jaǵdaıy turaqty. Aktıvter boıynsha elimizdegi 23 banktiń arasynda 6-orynda. Atalǵan banktiń aktıvi - 2,6 trln teńge, al onyń ótimdiligi - 1,4 trln teńge. Kapıtal koeffıtsıentteri - 33%, bizdiń agenttik tarapynan qoıylatyn mınımaldy talap - 7,5%», – dedi Qarjy naryǵyn retteý jáne damytý agenttigi tóraǵasynyń orynbasary Oljas Qızatov OKQ-de ótken brıfıngide.

Onyń aıtýynsha, kapıtal jáne ótimdilik boıynsha atalǵan banktiń jaǵdaıy óte jaqsy.

Eske salsaq, jaqynda Bas prokýratýra Jusan tobyn Qazaqstanǵa qaıtarý jumysy júrgizilip jatqanyn habarlaǵan edi.

Ótken jyly maýsymda Prezıdent Qasym-Jomart Toqaevtyń tapsyrmasy boıynsha elden zańsyz shyǵarylǵan qarajatty Qazaqstanǵa qaıtarý jónindegi vedomstvoaralyq komıssııa qurylǵan sátten bastap Bas prokýratýra kapıtaldy jymqyrý jáne shet elge shyǵarý faktilerin anyqtaý úshin bank sektorynda taldaý júrgizdi.

Sondaı-aq, bıyl aqpanda Jusan Bank-tiń keı aktsııalary buǵattalǵany belgili boldy.

Sonymen qatar Nazarbaev zııatkerlik mektepteri Jusan-dy elge qaıtarýǵa qatysty málimdeme jasady.