Jusan bank 100 mlrd teńgeni memleketke merziminen buryn qaıtardy
ASTANA. KAZINFORM — Jusan bank «Samuryq-Qazynadan» óz oblıgatsııalaryn satyp alyp, memleket kómeginiń 100 mıllıard teńgesin merziminen buryn qaıtardy.
Bank 2024 jylǵy 9 sáýirde First Heartland Jusan Bank AQ (Jusan Bank) «Samuryq-Qazyna» Ulttyq ál-aýqat qory» AQ-dan 100 mlrd teńgege rettelgen oblıgatsııalar shyǵarylymyn merziminen buryn satyp alǵanyn habarlady.
«2023 jyldyń ortasynda Jusan Bank Qazaqstan ıýrısdıktsııasyna qaıtarylǵannan beri bank bıznes-protsesterdi jaqsartý, shyǵyndardy ońtaılandyrý, bıznestiń tıimdiligi men tabystylyǵyn arttyrý baǵytynda kóptegen jumystar atqardy. Osy jumystardyń tutas kesheni qarjylyq turaqty jáne áleýmettik jaýapty qazaqstandyq mekeme, memlekettiń senimdi seriktesi retinde bankke memleket kómeginiń bir bóligin merziminen buryn qaıtarýǵa múmkindik berdi», — dedi Jusan Bank-tyń dırektorlar keńesiniń tóraǵasy Ǵalymjan Esenov.
Esterińizge sala keteıik, Qarjy naryǵyn retteý jáne damytý agenttiginiń derekteri boıynsha 2024 jylǵy 3 sáýirge memlekettik qoldaý Jusan Bank, Bank RBK, Halyk bank, «Bank TsentrKredıt» (TsKB), «Eýrazııalyq bank» jáne «Nurbank» sekildi 6 qarjy uıymynda jalpy somasy 1,7 trln teńgege saqtaldy.
Agenttik banktiń memlekettik bıýdjet, Ulttyq qor, Ulttyq bank jáne (nemese) onyń enshiles uıymdarynyń qarajatyn paıdalana otyryp ornalastyrylǵan, satyp alynǵan nemese bankke berilgen salymdar, oblıgatsııalar, qaryzdar boıynsha, onyń ishinde banktiń qarjylyq ornyqtylyǵyn jáne (nemese) saýyqtyrylýyn qamtamasyz etý úshin kvazımemlekettik sektor sýbektileri arqyly banktiń mindettemeleri memlekettik qoldaý dep tanylatynyn atap ótti.
2024 jylǵy 8 sáýirde Halyk bank memleket aldyndaǵy memlekettik qoldaý sheńberinde alynǵan 250 mlrd teńge mólsherindegi bereshekti merziminen buryn ótegenin habarlady. Halyk Bank basqarma tóraǵasy Úmit Shaıahmetova Halyk Bank ózi tikeleı memlekettik qoldaý almaǵanyn atap ótti.
2015 jyly olardy qoldaý aıasynda BTA men «Kazkomertsbankke» aqsha bólindi.
