Juregimnin Jenimpazy: Astanadaǵy marafonǵa 5 myńǵa jýyq adam qatysty
ASTANA. KAZINFORM — Elordada jyl saıyn ótetin Juregimnin Jenimpazy atty qaıyrymdylyq júgirý festıvali uıymdastyryldy, dep habarlaıdy Astana qalasynyń ákimdigi.
Bıyl ol elimizdiń túkpir-túkpirinen kelgen 4,7 myń adamnyń basyn qosty.
Іs-sharany Heart Center Foundation qoǵamdyq qory uıymdastyrdy. Yntymaqtastyq týraly memorandým aıasynda qor jarys qorytyndysy boıynsha Respýblıkalyq transplantatsııany úılestirý ortalyǵyna 15 mln teńge kóleminde grant tapsyrdy.
Qatysýshylar 1, 3 jáne 10 shaqyrymdyq qashyqtyqty júgirip ótip, aǵza aýystyrýdy kútip otyrǵan naýqastarǵa qoldaý kórsetti. Resmı derekterge sáıkes, Qazaqstanda júrek, búırek, baýyr nemese ókpe transplantatsııasyna 4 myńnan astam adam muqtaj. Onyń ishinde 3 myńnan astamy búırekke, al 145-i júrekke zárý.
Qordyń negizin qalaýshy, UMC basqarma tóraǵasy, belgili kardıohırýrg ıÝrıı Pıa Qazaqstannyń Ortalyq Azııadaǵy transplantatsııa jáne qaıtys bolǵannan keıingi donorlyq damyǵan jalǵyz el ekenin atap ótti.
— Bizdiń elimiz — Ortalyq Azııadaǵy transplantatsııa jáne qaıtys bolǵannan keıingi donorlyq damyǵan jalǵyz memleket. Bul — eldiń damý deńgeıiniń kórsetkishteriniń biri. Alǵashqy júrek transplantatsııasy jasalǵanyna týra 13 jyl boldy. Sol kezden beri ota sany aıtarlyqtaı artty. Juregimnin Jenimpazy jobasy qoǵamda donorlyq týraly túsinikti qalyptastyrý maqsatynda ótkiziledi, bul onyń qundylyǵyn kórsetedi, — dedi ol.
Jarysqa qatysýshylardyń qatarynda dárigerler men beıjaı qaramaıtyn azamattar ǵana emes, donorlyq organ transplantatsııasyn kútý tiziminde turǵan dıalızdegi naýqastar da boldy.
Marafon qatysýshysy Qanat Baıbatyrov sharadan qandaı áser alǵanyn aıtty.
— Biz úshin bul jaı ǵana sport emes, ómirdiń jalǵasyp jatqanyn ózimizge eske salý múmkindigi. Mundaı sharalar kúsh beredi, shabyttandyrady jáne jańa maqsattar qoıýǵa kómektesedi, — deıdi ol.
Sonymen qosa 2022 jyly qaıtys bolǵan donordan búırek alǵan Anar Shaımergenovanyń áńgimesi kópshilikti tolqytty.
— Men tórt jyl kúttim jáne qoǵamda qaıtys bolǵannan keıingi donorlyq týraly aqparattyń az ekenin túsindim. Bul júgirý adamdarǵa donorlyqty eske salady: bul — qalypty jaǵdaı, jáne ol kóptegen ómirdi saqtap qalady. Biz, kútý paraǵyndaǵy patsıentter — sizderdiń kórshilerińiz, áriptesterińiz, ustazdaryńyz bolamyz. Muny múmkindiginshe kóp adamnyń bilgeni mańyzdy, — deıdi ol.
Aıta keteıik, Juregimnin Jenimpazy 2018 jyldan beri ótkizilip keledi. Ol alǵashynda nebári 60 adam qatysqan shaǵyn velojarystan bastalǵan edi. Búginde ol memlekettik sektordy, bıznesti jáne myńdaǵan janashyr qazaqstandyqty biriktiretin aýqymdy áleýmettik qozǵalysqa aınaldy.
Osyǵan deıin qaıyrymdylyq júgirý marafonyna baılanysty birneshe kóshede kólik qozǵalysy ýaqytsha shekteletini habarlandy.