Junior Eurovision: Qazaqstanda ulttyq irikteý bastaldy
NUR-SULTAN. QazAqparat – Qazaqstanda «Junior Eurovision-2021» halyqaralyq baıqaýyna ulttyq irikteý bastaldy, dep habarlaıdy QazAqparat tilshisi.
Jalpy «Balalar Evrovıdenıesi-2021» halyqaralyq baıqaýyna qatysýǵa 819 ótinim kelip túsken. Endi qazylar alqasy solardyń ishinen úzdik degen 30 qatysýshyny anyqtaıdy.
«Junior Eurovision» Qazaqstanda balalar shyǵarmashylǵynyń halyqaralyq deńgeıde damýyna shabyt beretin aýqymdy joba. Jeńisten buryn halyqaralyq deńgeıde Qazaqstannyń aty atalady, bunyń ózi mártebe. Ekinshiden, jas ónerpazdarǵa qanat bitiretin dúbirli doda. Elimizde ónerli balalardyń kóptigi qýantady. Búginde jas ónerpazdardyń talantyn tanytýǵa múmkindikter jetip jatyr, ınternet keńistigi de damyǵan. Sońǵy jyldary elimiz «Balalar Evrovıdenıesinen abyroımen oralyp júrip júr. Oǵan Erjan Maksım men Qaraqat Bashanovanyń jetistigi dálel. Bıyl da otandyq ónerpaz el namysyn tıisti deńgeıde qorǵaıdy degen úmittemin», - dedi qazylar alqasynyń múshesi, elimizge tanymal óner qaıratkeri Qanat Aıtbaev.
Uıymdastyrýshylardyń aıtýynsha, kelesi kezeńge ótetin 30 qatysýshynyń tizimi jevision.khabar.kz saıtynda jarııalanady. Jáne úmitkerlerge onlaın daýys berý búgin túngi 00.00-de bastalyp, 12 qazanǵa deıin jalǵasady.
«Ádilqazy retinde men úshin qatysýǵa qoıylatyn talap, onyń daýys dıapazony men yrǵaǵynyń bolýy shart. Sonymen qatar sahnada ózin-ózi ustaı bilýi óte mańyzdy. Árıne álemdik deńgeıdegi jarysta el namysyn qorǵaıtyn bolǵandyqtan úmitkerlerge qoıylatyn talap óte joǵary. Tańdaý qıynǵa túseıin dep tur, sebebi talantty balalar kóp. Ár qatysýshy óz betinshe daryndy. Olardyń repertýarlary da keń aýqymdy. Bizge kelip jatqan ánshi balapandar tek qazaq tilinde emes aǵylshǵyn, frantsýz basqa tilde án oryndap jatyr», - deıdi ánshi Mádına Sádýaqasova.
«Junior Eurovision» halyqaralyq baıqaýyna ulttyq irikteýdiń aqtyq syny 6 qarasha kúni tikeleı efırinde kórsetilmek.
Eske salsaq, bıyl 19-shy ret ótetin «Junior Eurovision» halyqaralyq balalar án baıqaýy Frantsııa astanasy Parıjde ótedi. Jáne onda álemniń 19 elinen talantty balalar baq synamaq. Qatysýshy elderdiń qatarynda Qazaqstan, Albanııa, Armenııa, Ázerbaıjan, Bolgarııa, Frantsııa, Grýzııa, Germanııa, Irlandııa, Italııa, Malta, Nıderlandy, Soltústik Makedonııa, Polsha, Portýgalııa, Reseı, Serbııa, Ispanııa jáne Ýkraına bar.
