Junior Eurovision: Erjan Maksımge jankúıerleri men synyptastary qoldaý bildirýde
NUR-SULTAN. QazAqparat - «Junior Eurovision-2019» baıqaýynda Qazaqstan atynan synǵa túsip jatqan Erjan Maksımge jankúıerleri, qurdastary men dostary qoldaý bildirýde. Bul jaıynda jas ánshi Іnstagram-daǵy óz paraqshasynda jazdy, dep habarlaıdy QazAqparat tilshisi.
«Jan-jaqtan kóptegen úlken qoldaýlar kelip jatyr. Solardyń biri Nur-Sultan qalasy ákimdiginiń №30 mektep-gımnazııasy ujymyna jáne mektep dırektory Sáýle Myńshalqyzyna úlken rahmet aıtamyn. Men bárińizdi de jaqsy kóremin», - dedi ol.
Erjanǵa Nur-Sultan qalasy ákimdiginiń №2 óner mektebi ujymy da qoldaý kórsetýde.
«Nur-Sultan qalasy ákimdiginiń №2 óner mektebi ujymy jáne mektep dırektory Gúlmıra Jangeldiqyzyna úlken alǵys aıtqym keledi. Men sizderdi jaqsy kóremin», - deıdi Erjan ujymnyń vıdeo úndeýin óz paraqshasynda jarııalaı otyryp.
Sondaı-aq Erjandy Máskeýden de quttyqtaýshylar bar. Synyptas dostary da aqjarqyn tilekterin bildirip, halyqaralyq án baıqaýynda jeńiske jetýine nıettes ekendikterin aıyp jatyr.
«Kóp rahmet Darııa apaı jáne meniń dostarym!!! Men de sizderdi qatty saǵyndym», - dedi jas ónerpaz.
Aıta keteıik, osy ýaqytta qazaqstandyqtar «Junior Eurovision-2019» baıqaýynda qatysyp jatqan Erjan Maksımge daýys berip jatyr.
19 elden jınalǵan úmitkerler úshin daýys berý búgin túnde, ıaǵnı qarashanyń 22-sinen 23-ine qaraǵan túngi saǵat 01.00-de bastaldy. Qazaqstandyqtar álemniń qaı túkpirinde júrse de óz otandasyna daýys bere alady. Ol úshin Junior Eurovision saıtyna kirip, tizimnen Erjanmen qatar taǵy 2 qatysýshyny tańdaý qajet. Keıin «Daýysty qabyldaý»/ «Daýys berý» túımeshegin basý kerek. Aıta keteıik, onlaın-daýys berý 24 qarasha kúni saǵat 21.00-de bastalatyn gala-kontsert aldynda ýaqytsha jabylady. Odan soń 15 mınýtqa qaıta ashylyp, taǵy bir márte daýys berý múmkindigi beriledi. Buǵan deıin habarlaǵanymyzdaı, búgin saǵat 21.00-de bastalatyn fınaldyq kezeńdi «Habar» arnasy tikeleı efırden kórsetedi.
Eske salaıyq, oraldyq jas ánshi 10 qazan kúni Almatyda baspasóz máslıhatyn ótkizip, baıqaýǵa arnalǵan «Armanyńnan qalma» ániniń beınebaıanyn kórsetti. Onyń rejısseri - Aleksandr Flomboım, prodıýseri - Sergeı Rýtskıı. Ánniń avtorlary - Hamıt Shanǵalıev, Danııar Aldabergenov jáne Tımýr Balymbetov.
15 qarasha kúni Nur-Sultanda ótken baspasóz máslıhatynda Erjan sahnaǵa neshinshi nómirmen shyqqysy keletinin aıtty. Jerebe tartý kezinde oǵan 10-ynshy nómir tústi.
«Habar» agenttiginiń basqarma tóraǵasy Erlan Bekhojınniń sózinshe, bıyl baıqaýǵa negizinen Eýropalyq odaq elderiniń ókilderi qatysady. Ázerbaıjan men Túrkııa óz kandıdattaryn usynbaǵandyqtan, Erjan búkil túrki álemniń atynan óner kórsetetin bolady.
18 qarasha kúni Erjan Almaty áýejaıynan Polshaǵa ushyp shyqty. Ony týysqandary men jankúıerler shyǵaryp saldy.
«Junior Eurovision» alǵash ret 2003 jyly Danııanyń Kopengagen qalasynda ótti. Bıylǵy baıqaýǵa 19 elden órender qatysady. Al Qazaqstan baıraqty básekege alǵash ret 2018 jyly Mınskide (Belarýs) qatysty. Elimiz atynan «Ózińe sen» ánimen Danelııa Tóleshova óner kórsetip, altynshy orynǵa ıe boldy. Bas júlde polshalyq Roksanna Vengelge buıyrdy. Ekinshi oryndy Frantsııa ánshisi Angelına, úshinshi oryndy avstralııalyq Djael Ýena jeńip aldy.
