Junior Eurovision baıqaýynyń fınaly onlaın formatta ótedi
NUR-SULTAN. QazAqparat - Eýropalyq habar taratý odaǵy (EVS) bıyl jyl saıynǵy «Junior Eurovision 2020» halyqaralyq án baıqaýynyń fınaly jańa formatta usynylatynyn jarııalady. Bul sheshimniń basty sebebi - COVID-19 pandemııasy. Barlyq fınalısterdiń densaýlyǵyn saqtaý maqsatynda baıqaýda oryndalýǵa tıisti ánder saıysqa qatysýshy eldiń jergilikti stýdııasynda oryndalady, dep habarlaıdy QazAqparat «Habar» agenttigine silteme jasap.
EVS aqparaty boıynsha, barlyq qatysýshy elderdegi odaq músheleri ártistiń ónerin túsirý kezinde birdeı ornalasqan sahna men tehnıkalyq jabdyqtardy paıdalanýǵa kelisti. Baıqaýdyń fınaly alda josparlanǵandaı, 29 qarasha kúni ótedi.
Bıyl fınalǵa 13 el: Armenııa, Belarýs, Frantsııa, Grýzııa, Qazaqstan, Malta, Nıderlandy, Reseı, Serbııa, Ispanııa, Ýkraına, Polsha jáne Germanııa qatysady.
«COVID-19 pandemııasynyń sebebinen týyndap jatqan saparlarǵa qoıylǵan shekteýler jáne basqa da máselelerge baılanysty bıyl «Junior Eurovision» án baıqaýynyń barlyq qatysýshylaryn Polshada qabyldaı almaımyz», - dedi konkýrstyń sýpervaızeri Martın Osterdal.
«Alaıda, 2003 jyldan beri jyl saıyn ótkizilip kele jatqan bul baıqaý jalǵasýy tıis dep sheshtik. Bıylǵy ózgeristerge qaramastan, óz eliniń ókili retinde tańdalǵan barlyq talantty jastar áli de ózderin kórsetýge múmkindigi bar jáne dástúr boıynsha búkil álemniń otbasylary óziniń súıikti ánine onlaın rejımde daýys bere alady», - dep atap ótti jobanyń atqarýshy jetekshisi.
11 tamyzda Eýropalyq habar taratý odaǵynyń qaýymdasqan múshesi - «Habar» agenttigi Qazaqstan Respýblıkasynyń Mádenıet jáne sport mınıstrligimen birlesip, «Junior Eurovision» halyqaralyq án baıqaýynyń ulttyq irikteýine qatysýǵa ótinim qabyldaý bastalǵanyn jarııalady.
Al 1 qyrkúıek kúni 12 fınalıstiń esimi belgili boldy. 26 qyrkúıekte «Junior Eurovision» baıqaýynyń fınalynda Qazaqstan atynan kim qatysatyny anyqtalady.
«Habar» agenttigi jáne baıqaýdyń uıymdastyrý komıteti óz tarapynan - Eýropalyq habar taratý odaǵynyń sheshimin tolyq qoldaıdy, biz úshin de qatysýshylardyń densaýlyǵy árdaıym birinshi orynda. Biz baıqaý formatynyń ózgerýine qaramastan, Qazaqstannyń namysyn qorǵaıtyn qatysýshy óziniń joǵary kásibı deńgeıin kórsetetinine senimdimiz. Saıyskerdiń óz týǵan jerinde óner kórsetýi jáne barlyq qazaqstandyqtardyń qoldaýy qatysýshy júregine senimdilik uıalatatyny sózsiz», - deıdi «Habar» telearnasynyń dırektory jáne ulttyq irikteý qazylar alqasynyń múshesi Dınara Bısembına.
Esterińizge sala keteıik, atalmysh baıqaýǵa Qazaqstannyń osymen úshinshi márte qatysýy - «Habar» agenttiginiń 2016 jyldan beri Eýropalyq habar taratý odaǵynyń (EVU) qaýymdasqan múshesi atanýynyń arqasynda múmkin bolyp otyr. Bıyl baıqaýdyń ótýine Qazaqstan Respýblıkasynyń Mádenıet jáne sport mınıstrligi qoldaý kórsetti.
Aıta keteıik, baıqaýǵa 9 jastan 14 jasqa deıingi oryndaýshylar qatysa alady.
2018 jyly baıqaýǵa Danelııa Tóleshova «Ózińe sen» ánimen qatysyp, altynshy orynǵa ıe boldy. Byltyr Erjan Maksım «Armanyńnan qalma» ánimen ekinshi oryn aldy (qazylar alqasynyń sheshimi boıynsha - birinshi oryn).
Qazaqstannyń barlyq óńirinen 684 ótinim kelip tústi. Bastapqy kezeńde uıymdastyrýshylardyń mýzykalyq departamenti 72 ótinimdi iriktep aldy. Olardyń arasynan qazylar alqasy 30 qatysýshyny tańdap aldy, kórermenderdiń onlaın daýys berý nátıjesi boıynsha 12 fınalıstiń esimi belgili boldy.
