Junior Eurovision bastaldy: Qazaqstan atynan Davıd Charlın óner kórsetýde

ASTANA. QazAqparat – Armenııa astanasy Erevanda «Junior Eurovision-2022» HH halyqaralyq án baıqaýy bastaldy. Atalǵan óner báıgesinde Qazaqstan namysyn «Baqytty Bala-2022» IV halyqaralyq baıqaýynyń fınalısi Davıd Charlın qorǵaıdy, dep habarlaıdy QazAqparat tilshisi.

Án baıqaýynyń tikeleı translıatsııasy «Habar» telearnasynyń efırinde júrip jatyr. Sondaı-aq Junior Eurovision-niń YouTube-arnasynan baıqaýdy onlaın kórýge bolady.

Qazaqstandyq Davıd Charlın joba úshin arnaıy jazylǵan «Jer-Ana» atty kompozıtsııasyn oryndady.

10 jeltoqsan kúni saǵat 01:00-de bastalǵan daýys berýdiń alǵashqy kezeńi búgin birer mınýt buryn ǵana aıaqtalǵanyn eske salamyz. Qatysýshylarǵa daýys berýdiń ekinshi kezeńde búgin barlyq qatysýshylar óner kórsetip bolǵannan keıin 15 mınýtqa qaıta ashylady.

Davıd Charlınge daýys berý úshin: https://junioreurovision.tv/ nemese https://jesc.tv/ siltemeleri arqyly saıtqa kirý; tizimnen Davıd Charlındi tańdaý; «Daýys berý» batyrmasyn basý.

Aıta keteıik, Qazaqstan «Junior Eurovision» álemdik án dodasyna osymen besinshi márte qatysyp otyr. Bul joly elimizden basqa eýropalyq 15 memlekettiń jas ánshileri baq synaıdy.

Eske salsaq, 2018 jyly bul baıqaýǵa Qazaqstan atynan alǵash bolyp jas ánshi Danelııa Týleshova qatysyp, 6-oryn ıelengen bolatyn. 2019 jyly jalpy daýys berý nátıjesinde Erjan Maksım 2-júldeli orynǵa ıe boldy. 2020 jyly Qaraqat Bashanova da 2-orynǵa taban tiredi. Byltyr Qazaqstannan Beknur Jánibekuly men Álınur Hamzın qatysyp, 19 eldiń ishinen 8-orynǵa turaqtady.