Junior Eurovision-2018: Danelııanyń ónerin qaıdan tamashalaýǵa bolady
ALMATY. QazAqparat - Qazaqstandyqtar Junior Eurovision-2018 dodasyn «Habar» arnasynan kóre alady. Sonymen qatar kórermender Danelııa Týleshovaǵa daýys bere alady, dep habarlaıdy QazAqparat tilshisi.
Bıylǵy án dodasyna Qazaqstan jas ánshisin eń alǵash ret báıgege qosqaly otyr.
19 qarashada jerebe tastalady. Jerebe tastaý saltanatyn «Habar» arnasynda túngi 23.00-te tamashalaýǵa bolady.
Al 25 qarasha kúni 21:00-de «Habar» arnasy baıqaýdy tikeleı efırden kórsetedi.
Barlyq ónerpazdardyń ónerin tamashalaǵan soń qazylar alqasy daýys berýge kirisedi. Olardyń qatarynda 3 eresek ánshi men 2 bala bar. Sonymen qatar daýys berýge kórermender de qatysa alady.
«Qazaqstandyqtar tek qana Danelııaǵa daýys berip qana qoımaı, basqa da unaǵan konkýrsanttarǵa daýys bere alady. Kórermenderge bul múmkindik 23-25 qarasha arasynda junioreurovisioin.tv saıtynda beriledi. Halyqaralyq Junior Eurovision-2018 baıqaýy eresekterge arnalǵan baıqaýdyń balamasy. Bıyl Qazaqstan 14 jylda birinshi ret qatysqaly otyr. Qazaqstanda baıqaýdy «Habar» arnasynda tamashalaýǵa bolady», - dedi «Habar» telearnasynyń baspasóz qyzmeti.
