JPMorgan Tramptyń shottaryn japqanyn rastady — sot protsesi bastaldy
ASTANA. KAZINFORM — JPMorgan Chase banki alǵash ret 2021 jylǵy 6 qańtardaǵy Kapıtolıı mańyndaǵy oqıǵadan keıin Donald Tramp pen onyń kompanııalarynyń bank shottaryn japqanyn resmı túrde rastady. Bul týraly Kazinform agenttiginiń Vashıngtondaǵy menshikti tilshisi NBC News-ke silteme jasap habarlaıdy.
Bank atalǵan aqparatty prezıdenttiń JPMorgan jáne onyń bas dırektory Djeımı Daımonǵa qarsy bergen sot talap-aryzy aıasynda rastady. Osylaısha, prezıdent pen AQSh-tyń eń iri banki arasyndaǵy «banktik júıeden ajyratý» dep atalatyn daýǵa baılanysty sot tartysynyń jańa kezeńi bastaldy.
Buǵan deıin Tramp JPMorgan-ǵa qarsy talap-aryzdy Florıda shtatyndaǵy sotqa bergen. Qazirgi ýaqytta onyń negizgi rezıdentsııasy osy shtatta ornalasqan. Osy aptada usynylǵan qujattar JPMorgan Chase-tiń isti shtattyq sottan Nıý-Iork qalasyndaǵy federaldyq sotqa kóshirý áreketteriniń bir sanalady.
Atap aıtqanda, osyǵan deıin bank shottary Nıý-Iorkte ashylǵan edi jáne Tramp sońǵy ýaqytqa deıin óziniń iskerlik operatsııalarynyń basym bóligin sol jerde júrgizgen.
Tramptyń advokattary jasaǵan málimdemege qaraǵanda, JPMorgan prezıdent pen onyń kompanııalaryn repýtatsııalyq «qara tizimge» engizdi. Osy tizimdi bank pen basqa da qarjy ınstıtýttary qyzmet kórsetýden bas tartý úshin paıdalanady.
Óz kezeginde JPMorgan Tramptyń talap-aryzyndaǵy talaptar negizsiz ári quqyqtyq turǵydan dálelsiz dep sanaıtynyn jetkizdi.
Bul — Tramptyń iri bankke qarsy bergen alǵashqy sot isi emes. 2025 jylǵy naýryzda Trump Organization dál osyndaı sebeptermen nesıe kartalaryn shyǵaratyn alpaýyt kompanııa Capital One-ǵa qarsy sotqa júgingen bolatyn. Atalǵan isti qaraý áli de jalǵasyp jatyr.
Aıta keteıik, osyǵan deıin Tramp JPMorgan Chase jáne onyń bas dırektory Djeımı Daımonǵa qarsy 5 mlrd dollar kóleminde talap-aryz túsirgeni habarlanǵan edik.
Eske salsaq, AQSh-tyń burynǵy prezıdentteri Barak Obama, kishi Djorj Býsh, Bıll Klınton jáne Djımmı Karter 2021 jylǵy qańtarda Kapıtolııge jasalǵan shabýyl men AQSh Kongresi ǵımaraty aldyndaǵy narazylyqty aıyptady.
Arýjan Jǝnǝdil