«JORYQ» at sporty federatsııasy Ulttyq sport qaýymdastyǵyna engen 10-shy uıym atandy
Ulttyq sport qaýymdastyǵynyń prezıdenti Islambek Saljanov pen «JORYQ» at sporty federatsııasynyń prezıdenti Baqytjan Turlybek yntymaqtastyq týraly memorandýmǵa qol qoıdy, dep habarlaıdy Kazinform.
Taraptar el úshin mańyzy zor is-sharalardy uıymdastyrýda jáne ulttyq sport túrlerin damytýda ózara qoldaý kórsetý, sondaı-aq qazaq mádenıetin halyqaralyq deńgeıde nasıhattaýǵa jan-jaqty kómek kórsetý týraly kelisti.
«JORYQ» at sporty federatsııasynyń basshysy Baqytjan Turlybek atap ótkendeı, dál qazir Qaýymdastyq Qazaqstandaǵy ulttyq sport túrlerin damytýǵa jaýapty negizgi uıym bolyp tabylady.
Qaýymdastyqqa kiretin federatsııalar ózderiniń jattyǵý metodıkasyn ázirledi, sondaı-aq kvalıfıkatsııasy joǵary jattyqtyrýshylar quramy men tıisti ǵylymı qoldaýǵa ıe.
Buǵan deıin «JORYQ» at sporty federatsııasy men Ulttyq sport qaýymdastyǵy «Uly dala joryǵy» keń aýqymdy respýblıkalyq marafon-báıge jobasyn júzege asyrdy. 2023 jyly bul jarysqa qatysýshylar Astanadan Túrkistanǵa deıin 1300 shaqyrymdy baǵyndyrdy. 2024 jyly mereıtoılyq 5-shi Dúnıejúzilik kóshpendiler oıyndary aıasynda «Uly dala joryǵy» marafony ótedi.
«Kelesi jyly biz Dúnıejúzilik kóshpendiler oıyndary aıasynda halyqaralyq marafon uıymdastyrýdy josparlap otyrmyz. Ol úshin Ulttyq sport qaýymdastyǵynyń bizge kórsetetin qoldaýy óte mańyzdy. Osyǵan baılanysty Qaýymdastyqqa múshe bolýdy jón kórdik», – deıdi Baqytjan Turlybek.
Osylaısha, «JORYQ» at sporty federatsııasy Báıge, Kókpar, Aýdaryspaq, Jamby atý, Teńge ilý, Qusbegilik, Dástúrli sadaq atý, Asyq atý, Toǵyzqumalaq federatsııalarymen qatar Qaýymdastyqqa engen 10-shy federatsııa atandy. 2022 jyldyń qyrkúıek aıynan bastap Ulttyq sport túrleri qaýymdastyǵyn kásipker, metsenat Islambek Saljanov basqarady.
