JOLTAP jobasy: astanalyqtardy oqytý jáne jumysqa ornalastyrý qalaı júrgiziledi

Astana qalasynyń ákimi Jeńis Qasymbek Instagram paraqshasynda JOLTAP jobasy týraly jazdy, dep habarlaıdy Kazinform elorda ákimdiginiń resmı saıtyna silteme jasap. 

Jeńis Qasymbek «ómir súrý sapasy negizinen tańdaǵan mamandyq pen jumysqa baılanysty ekenin, degenmen qala turǵyndarynyń bári birdeı belgili bir mamandyq ıesi bola almaǵanyn» atap ótti.

Sondaı-aq birer aı buryn iske qosylǵan joba arqyly naryqtaǵy qajetti daǵdylardy meńgerýge jáne jumysqa ornalasýǵa úlken múmkindik ashylǵanyn tilge tıek etken.

«Qyrkúıek aıynda biz JOLTAP áleýmettik jobasyn iske qostyq. Joba memlekettik qoldaý sharalary, ataýly áleýmettik kómek, bıznes ashýǵa ótinim berý, oqytý, jumys izdeý boıynsha tegin konsýltatsııa beredi. JOLTAP jobasy aıasynda qala turǵyndary qysqa merzimdi eki baǵdarlamada tegin bilim alady», — dep jazady Jeńis Qasymbek.

Birinshi baǵdarlama tiginshi, naýbaıshy, satýshy-kassır, qoǵamdyq tamaqtandyrý qyzmetiniń ámbebap qyzmetkeri, barısta sııaqty 5 jumysshy mamandyǵyn oqytýǵa arnalǵan.

Ekinshi baǵdarlama — «Freelance Mumkindik» 7 tsıfrlyq daǵdyny oqytady: targetolog, SMM, vıdeograf, marketpleıs, mobılograf, grafıkalyq dızaıner jáne veb-dızaıner (saıt ázirleý).

Bul jobada qatysýshylar teorııalyq qana emes, praktıkalyq bilim de alady. Sol sııaqty olarǵa sertıfıkat berilip, jumysqa ornalasýǵa kómek kórsetiledi.

Oqytý uzaqtyǵy baǵdarlamaǵa baılanysty on kúndik kýrstan bir jarym aıǵa deıin sozylady.

JOLTAP jobasy Memleket basshysynyń nátıjeli jumys oryndaryn qurýǵa basa nazar aýdara otyryp, belsendi áleýmettik saıasattyń qajettiligi týraly tapsyrmasyn oryndaý maqsatynda júzege asyrylyp jatyr.

Joba quraldary týraly tolyq aqparatty «Barshaǵa Múmkindik» modýldik pýnkteri arqyly myna mekenjaılardan alýǵa bolady:

Jastar saraıy, Respýblıka dańǵyly, 34;

«Tulpar» SO, Sh. Ýálıhanov kóshesi, 24;

Euromall SÚ, Qosshyǵululy kóshesi, 24;

Ailand SOO, Qorǵaljyn tasjoly, 2;

«Vstrecha» SÚ, Abylaı han dańǵyly, 31;

«Mechta» SÚ, Syǵanaq kóshesi, 3;

«Azııa Park» SOO, Qabanbaı batyr dańǵyly, 21;

Magnum sýpermarketi, Edil kóshesi, 26;

«Saıanur» bazary, Tilendıev dańǵyly, 24/5;

«Big Shanhaı» SÚ, Alash tasjoly, 32a.

Turǵyndarǵa yńǵaıly bolý úshin JUMYS TAP (@jumystap_bot) Telegram-bot iske qosyldy, onda mańyzdy bos jumys oryndary jarııalanady.