Joltap-ta oqyǵandardyń 60%-y jumysqa ornalasty
ASTANA. KAZINFORM — Astanada Joltap áleýmettik jobasy arqyly 13 myń adam turaqty jumysqa ornalasty. Úsh jylda 22 myń azamat tegin oqýdan ótip, júzdegen túlek óz kásibin ashqan. Bul týraly Úkimettiń baspasóz qyzmeti málim etti.
Astanada nátıjeli jumyspen qamtý arqyly halyqtyń tabysyn arttyrýǵa baǵyttalǵan Joltap áleýmettik jobasy júzege asyrylýda. Prezıdent Qasym-Jomart Toqaevtyń tapsyrmasy boıynsha júzege asyrylyp jatqan bastama úsh jyl ishinde shaǵyn jáne orta bıznes pen qyzmet kórsetý salasy úshin bilikti kadrlar daıarlaýda óziniń tıimdiligin kórsetti. Jobanyń nátıjeleri men jumys erekshelikteri týraly joba jetekshisi Dana Júnisova aıtyp berdi.
Joba iske qosylǵan ýaqyttan beri oǵan shamamen 42 myń azamat júginip, onyń ishinde 22 myń azamat oqýdy aıaqtady.
— Búginde túlekterimizdiń 60%-y jumyspen qamtylǵan, 17%-y frılans formatynda jumys isteıdi, al 2 myńǵa jýyq adam óz shaǵyn kásibin ashty. ıAǵnı, bireýleri tigin atelesin, endi bireýleri barısta mamandyǵyna oqytatyndyqtan, shaǵyn kofeınıalar ashty. Sondaı-aq shaǵyn jıhaz nemese dánekerleý tsehtaryn ashqan túlekterimiz de bar,— dedi Dana Júnisova.
Jobaǵa qatysýshylardyń 73%-y áıelder. Oqytýdan halyqtyń áleýmettik osal toptary sanatyndaǵy 9,3 myńnan astam otbasy, onyń ishinde 4,6 myńnan astam kópbalaly otbasy ókilderi ótti. Joltap aıasynda jumys berýshilermen birlesip qurylǵan 30 avtorlyq baǵdarlama ázirlendi, onyń 19-y jumysshy mamandyǵy, onyń ishinde tiginshiler, naýbaıshylar, elektr-gazben dánekerleýshiler, jıhaz jınaýshylar, sondaı-aq SMM, targetıng, grafıkalyq dızaın jáne mobılografııany qosa alǵanda, 11 tsıfrlyq baǵyt bar.
Tsıfrlyq kýrstardyń mańyzdy ereksheligi JI quraldarynyń engizilýi boldy, ol úshinshi tarap mamandaryn tartpaı-aq jarnama jasaýǵa jáne óz isin ilgeriletýge múmkindik beredi. Teorııalyq baza mamandandyrylǵan synyptarda ornalasqan, al praktıka qalanyń jumys istep turǵan 11 kásiporny men tsehtarynyń bazasynda ótedi. Kýrstarda oqý tolyǵymen tegin, al baǵdarlamalar kolledjderde oqytylatyn mamandyqtardy qaıtalamaıdy.
Olarǵa Astana qalasynyń, sondaı-aq Qosshy qalasyn qosa alǵanda, irgeles eldi mekenderdiń turǵyndary jazyla alady, bul rette turaqty tirkeýdiń bolýy talap etilmeıdi. Ótinishter «Barshaǵa múmkindik» mobıldi pýnktterinde, sondaı-aq aýdan ákimdikteri men elordanyń Jumyspen qamtý basqarmasynyń Mansap ortalyqtarynda qabyldanady. Oqý aıaqtalǵannan keıin qatysýshylar oqytýshy-praktıkterden saraptamalyq qoldaý alýdy jalǵastyrady.
Búginde joba jumyspen qamtýǵa járdemdesýdiń memlekettik sharalaryna proaktıvti ári tıimdi qosymsha tetik retinde qyzmet etip otyr. Oqytýǵa suranys ta joǵary deńgeıde saqtalýda – aı saıynǵy kezekte keminde 3 myń adam bar. Qazaqstan Parlamentiniń birinshi sessııasynda Prezıdent Qasym-Jomart Toqaev bul tájirıbeni elimizdiń barlyq óńirine taratýdy tapsyrdy.
