«JOLSHY» biryńǵaı derekqory iske qosyldy

ASTANA. KAZINFORM —  Jumysshy mamandyqtar jyly aıasynda avtojol salasy mamandarynyń biryńǵaı derekqory «JOLSHY» iske qosyldy. Bul týraly Kólik mınıstrliginiń baspasóz qyzmeti habarlady. 

Derekqor myna silteme arqyly qoljetimdi.

Kólik mınıstrliginiń Qazaqstan jol ǵylymı-zertteý ınstıtýty ázirlegen jańa tsıfrlyq servıs kadr tapshylyǵyn sheshýge jáne saladaǵy basqarý ashyqtyǵyn arttyrýǵa baǵyttalǵan.

— Derekqor stýdentter, túlekter, ınjenerler men basshylar týraly málimetterdi biriktiredi. Onda mamandardyń bilimi, eńbek ótili jáne biliktilikti arttyrý kýrstarynan ótýi týraly aqparat saqtalady. Qazirgi tańda eki myńnan astam paıdalanýshy tirkelgen. Jumys berýshiler úmitkerdiń naqty kásibı profılin kóre alady, al stýdentter tájirıbeden ótip, mamandyǵy boıynsha jumysqa ornalasý múmkindigine ıe bolady, — delingen habarlamada.

2025 jylǵy 1 qyrkúıekten bastap jol salasy qyzmetkerleri úshin biliktilikti mindetti túrde arttyrý talaby engiziledi. Bul úderis te «JOLSHY» arqyly tirkeledi. Jaqyn arada derekqor «e-License» jáne «Enbek.kz» júıelerimen biriktirilmek.

Osylaısha, «JOLSHY» memlekettik saıasattyń tıimdi quralyna aınalyp, kadr tapshylyǵyn joıýǵa, ashyqtyqty arttyrýǵa jáne avtojol salasy mamandarynyń kásibı ósýine jaǵdaı jasaıdy. 

Aıta ketelik 2029 jylǵa deıin 11 myń km temirjol jóndeledi.