Johnson & Johnson kompanııasynyń murageri Barbara Djonson dúnıeden ótti
ASTANA. 8 sáýir. QazAqparat - Polshada álemdegi baı áıelderdiń biri - Barbara Pıasetskaıa Djonson dúnıeden ótti, dep habarlady Lenta.rý.
Ol 1 sáýirde uzaqqa sozylǵan naýqastan keıin kóz jumǵan bolatyn, biraq bul týraly habardy týystary úsh kúnnen keıin ǵana jarııa etti. Barbara Pıasetskaıa Djonson 15 sáýirde Vrotslavta jerlenbek.
Onyń ómirbaıany «amerıkandyq armannyń» is júzine asqanynyń kýási. Burynǵy qyzmetshi áıel álemge tanymal bıznes-ımperııanyń muragerine aınaldy.
Barbara Pıasetskaıa 1937 jyly Polshanyń shyǵysyndaǵy Stanevıchı derevnıasynda - qazirgi Belarýstiń Grodno oblysynda Berestovıtsk aýdanynda dúnıege kelgen. Onyń ákesi fermer boldy, Ekinshi dúnıejúzilik soǵystan keıin Pıasetskııler eldiń batysyna qonys aýdaryp, Vrotslavqa ornyqty. Barbara Vrotslav ýnıversıtetinde óner tarıhyn ıgerip, keıin Rımge oqýǵa attandy, al 1968 jyly odan Qurama Shtattarǵa jol tartty. den
Sulý qyz Amerıkaǵa júz shaqty dollarmen barǵan, aǵylshyn tilin bilmegen. Qarjy tapshylyǵynan qyzmet izdep júrip, Nıý-Djersıde Johnson & Johnson korporatsııasynyń ıegeri bolǵan Djonsonnyń uly Djon Sıýard Djonsonnyń jeke úıinde qyzmetshi áıel bolyp jumysqa ornalasqan. Djonson ol kezde dáriler men medıtsınalyq jabdyqtar «ımperııasynyń» murageri bolyp, jarty ǵasyrdaı otbasylyq bıznestiń dırektory qyzmetin atqaryp júrgen. Polıak «Zolýshkasy» ózinen qyryq eki jas úlken qartaıǵan «hanzadanyń» júregin jaýlap alyp, áıelinen aıyryp, turmysqa shyqty. Magnat qaıtys bolǵannan keıin Johnson & Johnson kompanııasynyń 500 mln dollar aktsııasyna ıe boldy. Epti áıel bul kapıtaldy ulǵaıtyp, 2013 jyly álemdegi eń baı áıelder reıtıngisine endi. Onyń dáýleti 3,6 mlrd. dollardy qurady.
