BUU Qaýipsizdik Keńesi Sırııa prezıdentine qarsy sanktsııalardy alyp tastady

ASTANA.KAZINFORM - BUU Qaýipsizdik Keńesi beısenbi kúni Sırııanyń qazirgi prezıdenti Ahmad ash-Sharaa men Іshki ister mınıstri Anas Hattabty DAISh pen Ál-Qaıda (Qazaqstanda tyıym salynǵan uıymdar – red.) uıymdaryna qarsy sanktsııalar tiziminen alyp tastaý týraly qarar qabyldady, dep habarlaıdy Kazinform agenttigi.

BUU málimeti boıynsha, buǵan Qaýipsizdik Keńesiniń 15 múshesiniń 14-i qoldap daýys berdi. Qytaı qalys qaldy.

Qarar mátininde «Sırııa Arab Respýblıkasynyń egemendigin, táýelsizdigin, aýmaqtyq tutastyǵyn jáne ulttyq birligin tolyq qurmetteýge degen mindettemelerin» qaıta rastaıtyny aıtylǵan.

Qaýipsizdik Keńesiniń músheleri sonymen qatar «Sırııa Arab Respýblıkasynyń uzaq merzimdi qalpyna kelýine, turaqtylyǵyna jáne ekonomıkalyq damýyna yqpal etý nıetin» málimdedi.

Sonymen qatar, qujatqa sáıkes, mundaı kúsh-jiger DAISh jáne Ál-Qaıda (Qazaqstanda tyıym salynǵan uıymdar – red.) uıymdaryna qarsy sanktsııalar rejıminiń tutastyǵy men tıimdiligine áser etpeýi kerek.

Qarar terrorızmge qarsy turýdyń, adam quqyqtaryn qorǵaýdyń, gýmanıtarlyq kómekke qoljetimdilikti qamtamasyz etýdiń jáne Sırııa basqaratyn saıası protsesti ilgeriletýdiń mańyzdylyǵyn qaıtalaıdy.

Eske sala keteıik, ótken jyldyń jeltoqsan aıynda Sırııa prezıdenti Bashar Asad bılikten ketti.

Al 2025 jyldyń qańtar aıynyń sońynda Ahmad ash-Sharaa resmı túrde Sırııanyń ýaqytsha prezıdenti bolyp jarııalandy.

Biz buǵan deıin Sırııa prezıdentiniń 1967 jyldan beri alǵash ret BUU Bas Assambleıasyna qatysqanyn habarlaǵan edik.