JJ teledebaty: Súrindirgen saýal da, jaltarǵan jaýap ta boldy
ASTANA. KAZINFORM – «Jibek Joly» telearnasynyń tikeleı efırinde ótip jatqan saıası partııa ókilderiniń arasyndaǵy teledebattyń úshinshi kezeńi de aıaqtaldy.
Bul kezeńde ár partııa óz tańdaýy boıynsha kez kelgen bir partııaǵa suraq qoıa alatyn. Al tańdaý reti kúni buryn ótken jerebe nátıjesi boıynsha anyqtaldy.
Teledebat shartyna sáıkes, ózge partııa ókiliniń suraǵyna jaýap bergen partııa ókiline ózge pikirsaıysshylar ekinshi ret suraq qoıa almaıdy. Onyń ústine suraqtar teledebat taqyryby retinde tańdap alynǵan «Zań men tártip – Ádiletti Qazaqstannyń negizi» uranynyń aıasynda bolýy shart edi. Saýalǵa jaýap berýshige 2 mınýt ýaqyt berildi. Jaýap aıaqtalǵan soń, suraq qoıýshyǵa berilgen jaýap qanshalyqty kóńilinen shyqqanyn aıtý úshin 30 sekýnd ýaqyt usynylyp otyrdy.
«Aq jol» partııasynyń ókilderi «aýyldyqtarǵa» maldy chıpteýdiń talabyn jeńildetý týraly suraq qoıyp, jaýapqa tolyq qanaǵattanbaǵandaryn aıtty.
Al JSDP tarapynan Respublica partııasyna qoıylǵan suraq jeke menshik quqyǵy týraly qyzý pikirtalasqa ulasty.
«Ádilet» partııasynyń saýalyna bergen JSDP ókilderi halyqtyń qaýipsizdigi sol zańdy oryndatýǵa jaýapty memlekettik organdardyń qolynda ekenin aıtyp jaýap qatty. «Ádilet» ókili JSDP-ny osy baǵytta birlesip jumys isteýge shaqyrdy.
Qazaqstan Halyq partııasynyń ókili qoıǵan suraqqa «Ádilet» partııasynyń ókili memlekettiń jaýapkershiligi men zań ústemdigi uǵymdary «bárine ruqsat» degen túsinikke aınalmaýy kerektigin aıtyp, jaýap berdi.
«Aýyl» partııasy «Baıtaq» jasyldar partııasyna saılaýaldy baǵdarlamasynda ekologııadan basqa qandaı ózekti másele bar ekenin surady. «Baıtaq» ókili suraqty jańadan qosylyp jatqan jas ujymǵa emes, Parlamentten mandat alyp kelgen ózge partııalarǵa qoıýdy usyndy.
«Baıtaq» partııasy Qazaqstan Halyq partııasynyń tarıhyndaǵy kommýnıstik joldy eske salyp, qazirgi partııa býyny Iosıf Stalın men Fılıpp Goloşekınniń tarıhı tulǵasyna qatysty kózqarasyn surady. Suraq avtorlary berilgen jaýapqa qanaǵattanbady.
«Respublica» partııasy suraq qoıý múmkindigin paıdalana otyryp, «Aq jol» partııasyn bıznestiń múddesin qorǵaıtyn mańyzdy sátterde Úkimetpen ymyralasyp ketedi dep synady.
Teledebatty «Jibek Joly» telearnasynan bólek, Jibek Joly TV jáne rezervtik Jibek Joly News YouTube arnalary da kórsetedi. Kórermender tarapynan partııa ókilderine suraq týyndap jatsa, ekranda kórsetilgen WhatsApp nómirine joldaı alady.
Buǵan deıin habarlaǵanymyzdaı, 19 tamyzda Quryltaı saılaýy aldyndaǵy qorytyndy pikirsaıys ótedi. Oǵan saılaýǵa qatysatyn barlyq partııanyń tóraǵalary qatysady.
