Jibek Joly týrıstik poıyzyna Qytaı men Reseı saıahatshylary qyzyǵýshylyq tanytqan

ALMATY. KAZINFORM – Bıyl Naýryz merekesi qarsańynda Almatydan Jibek Joly týrıstik poıyzy úshinshi ret jolǵa shyǵady.

Almatynyń Óńirlik kommýnıkatsııalar qyzmetinde «Kazakh Tourism» UK» AQ Basqarma tóraǵasynyń orynbasary Danıel Serjanuly Qazaqstan men Ózbekstan arasyndaǵy «Jibek Joly» transshekaralyq temirjol týrynyń josparlarymen bólisti.

- Birinshi týrıstik poıyz ótken jyldyń sońynda, ekinshi osy jyldyń basynda jol júrdi. Úshinshi Áz-Naýryz merekesine týra kelip otyr. Jalpy búginge deıin 500-ge jýyq saıahatshy týr bıletterin satyp aldy. Onda tek jergilikti týrıster emes, sheteldikter de bar. Túrkııa, Qyrǵyzstan, Ýkraına jáne Reseı turǵyndary týrıstik poıyzben saıahattady, - dedi ol.

Sonymen qatar spıker týrıstik poıyzǵa Qytaı azamattary tarapynan qyzyǵýshylyq bar ekenin atap ótti. Danıel Serjanulynyń aıtýynsha, bul joly baǵdarǵa Ortalyq Azııadaǵy kóne qalalardyń biri - Taraz qosyldy. Naýryz aıynda «Almaty – Túrkistan – Tashkent – Samarqand – Taraz – Almaty» baǵdary boıynsha saıahatqa 300 týrıst attanady. Halyqaralyq týrdyń uzaqtyǵy bes kún.

Eske salaıyq, buǵan deıin Jibek joly týrıstik poıyzy alǵash ret Samarqandqa barǵanyn jazǵanbyz.