Jibek Joly týrıstik poıyzy: Qazaqstan, Ózbekstan jáne Tájikstandy qamtyǵan mádenı sapar bastaldy
ASTANA. KAZINFORM – 20–25 naýryz aralyǵynda «Jibek Joly» halyqaralyq týrıstik poıyzy Qazaqstan, Ózbekstan jáne Tájikstandy qamtyǵan mádenı-tanymdyq baǵyt boıynsha jolǵa shyqty.
Jobanyń jańa kezeńinde baǵyt alǵash ret Dýshanbe qalasyna deıin uzartyldy.
Marshrýt Uly Jibek jolynyń boıyndaǵy Almaty — Túrkistan — Samarqand — Dýshanbe — Tashkent — Almaty sekildi tarıhı qalalardy qamtydy. Osy arqyly kóne órkenıet oshaqtary men zamanaýı megapolıster birtutas baǵytta toǵysty. Týrǵa 400-den astam týrıst qatysty.
Týr paketine poıyzben jol júrý, kásibı gıdterdiń súıemeldeýimen ekskýrsııalar, týrıstik nysandarǵa kirý bıletteri jáne týroperatorlar uıymdastyrǵan transfer qyzmetteri engizildi.
Jobanyń mazmundyq qundylyǵy onyń Naýryz merekesi jáne qasıetti Ramazan aıynyń aıaqtalý kezeńimen tuspa-tus kelýi arqyly arta tústi. Bul kezeń — jańarý men rýhanı tazarýdyń, sondaı-aq halyqtar arasyndaǵy mádenı baılanystardy nyǵaıtýdyń aıqyn kórinisi. Týrıstter aımaq halyqtarynyń dástúrlerimen, ulttyq salt-dástúrlerimen, mýzykasy men turmys-tirshiligimen, sondaı-aq tarıhı murasymen tanysý múmkindigine ıe boldy.
Aıta keteıik, «Jibek Joly» týrıstik poıyzy 2024 jyly alǵash ret iske qosylyp, Qazaqstan men Ózbekstan arasynda 10 týrıstik reıs júzege asyryldy. Baǵytqa degen joǵary suranysqa baılanysty «Keruen Express» týrıstik poıyzy da qatar jolǵa qoıyldy. Jalpy, joba bastalǵaly beri shamamen 3000 týrıst tasymaldandy.
Sonymen qatar, «Jibek Joly» týrıstik poıyzy Kazakhstan International Tourism Fair (KITF) halyqaralyq kórmesinde TMD keńistigindegi alǵashqy halyqaralyq týrıstik poıyz retinde sátti júzege asyrylǵany úshin «Úzdik týrıstik ónim» nomınatsııasy boıynsha marapatqa ıe boldy.
Jobany «Qazaqstan temir joly» UK» AQ «Ózbekstan temir joldary», «Tájikstan temir joldary» jáne «Qazaqstan týrızm ındýstrııasy» qaýymdastyǵymen birlesip uıymdastyrdy.
Atalǵan týrıstik poıyzdyń iske qosylýy temirjol týrızminiń damýyna jańa serpin berip, óńir elderi arasyndaǵy mádenı baılanystardy nyǵaıtýǵa, sondaı-aq, Uly Jibek jolynyń tarıhı murasyn halyqaralyq deńgeıde keńinen nasıhattaýǵa yqpal etti.
Aıta ketelik «Jibek joly» týrıstik poıyzy jolǵa shyǵatyny týraly jazǵan edik.