Jibek Joly týrıstik poıyzy bul joly Qazaqstan men Ózbekstannyń eki qalasyna toqtalady
ASTANA. KAZINFORM — Jibek Joly týrıstik poıyzy Qazaqstan men Ózbekstan arasyndaǵy kezekti saparyna attandy. Bul týraly QR Týrızm jáne sport mınıstrligi málim etti.
Jibek Joly týrıstik poıyzy ekinshi saparyna shyqty. Bul joly temirjol saıahatynyń aıasy keńeıip, Qazaqstannyń Shymkent jáne Ózbekstannyń Samarqand qalalary qosyldy. Búgin Jibek Jolytýrıstik poıyzy «Almaty – Túrkistan – Tashkent – Samarqand – Shymkent – Almaty» baǵyty boıynsha saparyn bastady. Týr 2-7 qańtar aralyǵynda 5 kúnge jalǵasady. Ekinshi saparǵa 100-den astam jolaýshy attandy.
Saıahatshylar ejelgi qalalardyń erekshe atmosferasyna enip, Uly Jibek jolynyń izimen saıahattaıdy. Marshrýtqa qalalardyń negizgi kórneki oryndary engizilgen. Týrısterdiń jaılylyǵy úshin týr baǵdarlamasyna gıd qyzmeti, tamaqtaný, kórikti jerlerge kirý bıletteri men transfer qyzmetteri kiredi. Aıta keteıik, bul jolǵy temirjol saıahatynyń basty ereksheligi – týrıster poıyzda túneıdi. Poıyz sol ýaqytta belgilengen baǵyt boıynsha qozǵalysyn jalǵastyrady.
Halyqaralyq týrdy «Jolaýshylar tasymaly» AQ men respýblıkalyq «Qazaqstan týrızm ındýstrııasy» qaýymdastyǵy Kazakh Tourism UK AQ jáne QR Týrızm jáne sport mınıstrliginiń qoldaýymen uıymdastyrdy.
Eske sala keteıik, buǵan deıin týrıstik poıyz alǵashqy saparyn Almaty stantsııasynan 17 qarasha kúni bastaǵanyn jazǵan bolatynbyz.