Jibek Joly telearnasynda Aıgúl Múkeı júrgizetin jańa baǵdarlamanyń tusaýy kesiledi

ASTANA. QazAqparat – Osy senbide Jibek Joly telearnasynda «Bez prıkras» baǵdarlamasynyń tusaýkeseri ótedi. Baǵdarlama júrgizýshisi – tanymal jýrnalıst Aıgúl Múkeı, dep habarlaıdy QazAqparat tilshisi.

Joba avtorlarynyń atap ótýinshe, bul – beıresmı jańalyqtarǵa qatysty jańa týrashyl baǵdarlama. Onda sán, mýzyka, shoý-bıznes, áleýmettik jelide paıda bolǵan trendter syndy salalardy qamtıtyn múldem ártúrli taqyryptar qozǵalady. «Bez prıkras» baǵdarlamasynyń telejúrgizýshisi Aıgúl Múkeı kórermenmen birge ár adamdy tolǵandyratyn daýly oqıǵalardy, álemdik juldyzdardyń ómirin, siz bile bermeýińiz múmkin Qaznettegi eń ótkir jańalyqtardy talqyǵa salady.

Baǵdarlama telejúrgizýshisiniń atap ótýinshe, shyǵarmashylyq top muny ádil ári boıamasyz shynaıy jasap, ómirde týra sol qalpynda kórsetedi.

Bir baǵdarlamada birneshe taqyryp qamtylady. Alǵashqy shyǵarylymda kórermendi TikTok-tyń qazaq tilinde qoljetimdiligi jaıly jańalyq qýantatyn bolady. Sonymen qatar taıaý jyldary Qazaqstannyń jeńil ónerkásibin ne kútip turǵany, ánshiler Maılı Saırýs pen Shakıranyń súıiktilerinen qalaı ádemi qutylǵany jaıly sóz qozǵalady. Jelini Eminem, Snoop Dogg jáne 50 Cent trekterimen shýlatqan talantty neırokreator baǵdarlama qonaǵy bolmaq.

«Bez prıkras» baǵdarlamasy ár senbi saıyn saǵat 15:00-de Jibek Joly telearnasynda kórsetiledi.