Jibek Joly telearnasy Qostanaı oblysyndaǵy órt týraly jýrnalıstik zertteý jasady
Qazir arnanyń túsirilim toby aımaqqa arnaıy baryp, órt bolǵan jerde jýrnalıstik zertteý júrgizip jatyr. Derekti fılmge oqıǵa ornyndaǵy ahýal, qostanaılyqtardyń tótenshe jaǵdaıdaǵy tynys-tirshiligi arqaý bolmaq.
Derekti fılmniń avtory Andreı Demenoktyń aıtýynsha, túsirý toby Qostanaı oblysynda jeksenbiden beri júr. Qazir órtten eń kóp zardap shekken Amanqaraǵaı aýylyn túsirýde.
«Ormandaǵy órt aýylǵy úsh baǵyttan keldi. Ol kezde turǵyndardyń kóbi qaýipsiz jerge kóshirilip qoıǵan bolatyn. Qaraýsyz qalǵan úıler janyp ketti. Al túrli sebeptermen ketpeı qalǵandar úılerin órtten saqtap qaldy. Órtke kúıgen maldyń sýretteri bar. Kóbiniń qorasy otqa orandy. Qazir jurt úılerine qaıtyp jatyr. Biraq jaryq pen gaz joq. Bireý generator bergen eken, qazir búkil kóshe turǵyndary osy jalǵyz generatorǵa kezekpen tamaq isteıdi» - dedi Andreı Demenok.
Onyń aıtýynsha, órt shalǵan úılerdiń ornynda peshter men metaldan jasalǵan kireberis qaqpalar ǵana aman tur. Úı ıeleri zattardyń kerekke jaraıtynyn baspanasy órtten aman qalǵan kórshilerine tyqqyzyp, kúni boıy kúıbeń tirlikpen aldanyp júr.
«Aýyl halqy bir-birimen sóılese qalsa, gýmanıtarlyq kómek týraly aıtady. Báriniń alańdaıtyny ótemaqy máselesi. Tilsiz jaýdyń osynsha aýqym alyp ketýine kináliler jazalanýy kerek desip júr. Órt aýylǵa kep qalǵanda evakýtsııalyq sharalar shalaǵaı uıymdastyrylǵanyn, halyqty sabyrǵa shaqyryp, qaýiptiń betin toıtarýy tıis salalyq organ ókilderiniń ózi birnshi dúrbeleńge boı aldyrǵanyn aıtýshylar kóp. Kóbi búkil múlkin tastap, qujatyn ǵana alyp ketýge májbúr bolǵan. Turǵyndardyń aıtýynsha, úılerdegi órtti sóndirýge eshbir tehnıka bólinbegen, sebebi bar tehnıka munaı bazasyn qutqarýǵa jumyldyrylǵan», - deıdi Andreı Demenok.
Ol sondaı-aq, volonterlerdiń qajyrly eńbegine erekshe toqtaldy. Ortalyq pen aýyl arasynda damylsyz kómek tasyp shapqylap júrgen eriktilerdiń deni jastar ekenin aıtady.
Múlkiniń bári otqa oranǵan turǵyndarǵa eń áýeli et, jarma, makaron ónimderi qajet. Sondaı-aq tósek-oryn jabdyqtary men gıgıena quraldary kerek.
«Mundaǵy halyqtyń kóbi óń men tústiń arasynda júrgendeı. Kúni boıy kóńili kúıbeń tirshilikke aýyp, qas qaraıǵan kezde ǵana baratyn úıleri qalmaǵanyn túsinedi. Sol kezde qıyn. Kóbi resmı málim etilgen merzimde úılerdiń salynyp bitetinine kúmándanady. Soltústik aımaq bolǵandyqtan bir aıdan keıin sýyq bastalady», - deıdi fılm avtory.
«Shynaıy jýrnalıstik zertteý» aıdarymen jeksenbi kúni keshki saǵat 19.30-da shyǵatyn derekti fılmde óńirge Prezıdent kelgen kezde, kadr syrtynda qandaı jaıttar bolǵany týraly málimetter aıtylady.
Joba avtorynyń aıtýynsha, turǵyndardyń órttiń nege osynsha aýqym alyp ketkeni týraly óz boljamdary bar.
«Shynaıy jýrnalıstik zertteý» baǵarlamasynyń buǵan deıingi sany Almaty – Nur-Sultan jolynyń uzaqqa sozylyp ketken qurylysyna arnalǵan bolatyn.
«Biz mańyzdy taqyryptardy qozǵaýǵa, olardy jarııa etýge, adamdardyń shynaıy ómirin, olar qandaı jaǵdaıda ómir súrip jatqanyn kórsetýge tyrysamyz. Formaty da sál ózgeshe. Kadrda jýrnalısten góri keıipkerler kóbirek sóıleıdi. Bul fılmniń shynaıy bolýyna qajetti tetik», - deıdi Andreı Demenok.
