Jibek Joly telearnasynda alǵashqy komandalyq teledebat ótedi
ASTANA. KAZINFORM – 12 tamyz kúni saǵat 20:00-de Jibek Joly telearnasynda alǵashqy komandalyq televızııalyq debat ótedi.
Tikeleı efırde birinshi tarıhı Quryltaı saılaýyna qatysatyn jeti saıası partııanyń ókilderi kezdesedi. Taqyryby: Zań men tártip – ádiletti Qazaqstannyń negizi.
«Ádilet» partııasy - Aıjan Aımaǵanova men Mádı Myrzaǵaraev;
JSDP - Larısa Lı men Nuraınash Kamalova;
«Baıtaq» partııasy - Amalbek Ómirtaı men Almat Turtaev;
Qazaqstan Halyq partııasy - Jandos Bıdaıbekov pen Irına Smırnova;
«Aýyl» partııasy - Jazıra Sultanqulova men Erbolat Saýrykov;
«Aq jol» partııasy - Bek-Muhamed Jaýkebaev pen Ermek Ábildın;
Respublica partııasy - Oljas Quspekov pen Dınara Shúkijanova.
Debatqa qatysýshylar ózderiniń partııasy nelikten qoldaýǵa laıyq ekenine saılaýshylardy sendirýge tıis.
Kórermen nazaryna:
- saılaýaldy baǵdarlamalarǵa tolyq taldaý;
- tikeleı efırde kelip túsken eń ótkir suraqtarǵa jaýaptar;
- debatqa qatysýshylardyń pikiri boıynsha saılaýaldy baǵdarlamalardyń álsiz tustary;
- partııalar ókilettik merzimi ishinde oryndaýǵa mindetti bir naqty ýáde usynylady.
Tikeleı efır barysynda kórermender ekrandaǵy QR-kod nemese WhatsApp arqyly pikirtalasqa qatysýshylarǵa óz suraqtaryn joldaı alady.
Debat aıaqtalǵannan keıin tikeleı efırde «Ashyq stýdııa» saıası tok-shoýy efırge shyǵady. Sarapshylar pikirtalastyń negizgi sátterin, qatysýshylardyń sózin jáne debattardyń saılaý naýqanyna yqpalyn taldaıdy.
Alǵashqy komandalyq teledebatty 12 tamyz kúni saǵat 20:00-de Jibek Joly telearnasynyń tikeleı efırinen, sondaı-aq telearnanyń resmı YouTube arnasynan kórińizder.
