Jibek Joly telearnasy Silk Way Prime brendimen halyqaralyq naryqqa shyqty
ASTANA. KAZINFORM — 1 shilde kúni jańa halyqaralyq Silk Way Prime telearnasy habar tarata bastady. Bul - Silk Way tsıfrly teleotbasyndaǵy Reseı Federatsııasy aýmaǵynda efırge shyǵatyn úshinshi arna.
Jańa joba Qazaqstannyń tarıhy, mádenı-gýmanıtarlyq, ulttyq qundylyqtaryn nasıhattaıtyn tolyqqandy medıaplatforma qalyptastyrmaq.
Silk Way Prime — Jibek Joly telearnasynyń ýaqyt beldeýi men Reseı naryǵyndaǵy televızııalyq ónim suranysyna beıimdelgen halyqaralyq nusqasy. Arna efırinde tek qazaqstandyq kontent – kórkem fılmder, teleserıaldar, aqparattyq-saraptamalyq baǵdarlamalar, tok-shoý, mýzykalyq-oıyn-saýyq jáne tanymdyq jobalar.
- Silk Way Prime arnasyn efırge shyǵarýda halyqaralyq aýdıtorııanyń suranysy eskerildi. Biz qarqyndy damyp jatqan, álemge ashyq, jarqyn, mádenı baı Qazaqstan týraly aıtamyz. Telearna faktilermen sóıleıdi, emotsııa da bar, kontent kreatıvti, - deıdi Jibek Joly/Silk Way telearnasynyń atqarýshy dırektory Erkejan Kúntýǵan.
Aıta keteıik, halyqaralyq Silk Way sandyq teleotbasy quramyna birneshe arna kiredi:
Silk Way — aqparattyq-tanymdyq lifestyle-arna. Qazaqstan, aımaq pen álem jańalyqtaryn jetkizedi. Halyqaralyq mańyzdy sharalardy translıatsııalaıdy, eksklıýzıvti reportajdar formatynda kórsetedi.
Silk Way Cinema — klassıkadan bastap zamanaýı hıtterge deıin, sondaı-aq avtorlyq jumystar men festıvaldarǵa baǵyttalǵan fılmderdi kórsetýge salalanǵan kınoarna.
Silk Way Prime — jalpy taqyryptyq otbasylyq telearna (Jibek Joly arnasynyń halyqaralyq nusqasy).
Eske salsaq, Jibek Joly telearnasy «Tumar-2025» ulttyq televızııalyq syılyǵynyń eki nomınatsııasy boıynsha jeńimpaz atandy.