Jibek joly radıosynda jańa baǵdarlama: Áýe tolqynynda «Klıkbeıt»
ASTANA. KAZINFORM – Prezıdent teleradıokesheniniń quramyndaǵy Jibek joly radıosynda jańa avtorlyq joba jaryqqa shyqty. «Klıkbeıt» dep atalatyn bul baǵdarlama – Syrym Itqulovtyń tyń bastamasy. Ár jumada efırge jol tartatyn baǵdarlamanyń júrgizýshisi «Búgin LIVE» stýdııasyna qonaq bolyp, jańa jobany tanystyrdy.
– Qazir aqparattyq derekkóz óte kóp. Biraq senimge laıyǵy tym az. Bireýi asyra silteıdi, bireýi tipti shyndyqty jasyrady. Sondyqtan biz radıo tolqynynda jalpylama jańalyqtardy aıtyp qana qoımaı, zamanaýı, obektıvti, bazalyq jýrnalıstıkanyń prıntsıpterine negizdep, halyq nazar aýdaratyndaı, qıyn, kúrdeli aqparatty jalpaq, jatyq tilmen, barlyq óńirge, árbir tyńdarmanǵa túsinikti bolatyndaı etip jetkizýdi maqsat tutamyz, – dedi Syrym Itqulov.
Baǵdarlama áýe tolqynynda ár juma saıyn habar taratady. Uzaqtyǵy – 20 mınýt.
– Eger bul joba ár oqıǵaǵa ózindik oıymdy bildiretindeı avtorlyq joba sekildi bolsa, ýaqyt óte kele bul jobanyń potentsıaly joǵary bolmaq. Túrli qonaqtardan suhbat alyp, podkast sekildi etip, sonymen qatar suhbatty vıdeo formatta da jazyp, ony bólek YouTube arnasynda, TikTok-ta jarııalaýǵa bolatynyn kórdik. Kim biledi, bolashaqta teledıdar kórmeıtin, radıo tyńdamaıtyn tyńdarman men kórermen eń qyzyqty klıkbeıt tustaryn TikTok-tan kórip otyratyn bolar, – deıdi jýrnalıst.
Syrym Itqulov jedeldikti basty qaǵıda sanaıdy. Ol jańalyqty jyldam jetkizý ǵana emes, onyń shynaıylyǵyna kóz jetkizý mańyzdy ekenin aıtady.
– Eki apta buryn Taıaý Shyǵystaǵy ýshyqqan geosaıası jaǵdaı bolǵan kezde, túngi 11-den tańǵy 4-ke deıin uıyqtaýdyń ornyna Instagram-ǵa Stories salyp, qysqa-nusqa aqparat taratyp otyrdyq. Ol kezde neırosetpen jasalǵan vıdeolar kóp boldy. Sonyń qaısysy ras, qaısysy ótirik ekenin anyqtap, jedel habarlap otyrdyq. Ózge BAQ tańerteń uıqysynan oıanǵan soń ǵana osy aqparattardy jarııalap jatty, – deıdi ol.
Jýrnalıst jobanyń keleshegine úlken úmit artyp otyr.
– Qazir jýrnalıstıkada burynǵydaı «demalys kún» degen joq. Biz radıo tolqynyna aptasyna bir ret qana shyǵamyz degenmen de, bir aptanyń ishinde bolǵan ózekti jańalyqtardy tereńirek taldaýǵa múmkindik beredi degen oıdamyn, – deıdi Syrym Itqulov.
Eske sala keteıik, Jibek Joly telearnasy Silk Way Prime brendimen halyqaralyq naryqqa shyqty.