Jibek Joly radıosynan Prezıdenttiń jańa jyldyq quttyqtaýy berildi

ASTANA. KAZINFORM — Jańa jyldy jol ústinde qarsy alǵan qazaqstandyqtar bıyl alǵash ret Memleket basshysynyń quttyqtaýyn 101.4 FM jıiligindegi «Jibek Joly» radıosynan tyńdaı aldy.

«Jibek Joly» radıosy 2025 jylǵy 1 mamyrda habar tarata bastady jáne az ýaqytta-aq saıasatty, ekonomıkany, mádenıet pen mýzykany biriktiretin jańa aqparattyq-oıyn-saýyq platformasy retinde ózin tanyta bildi. Efırde aspaptyq súıemeldeýmen nemese mınýs-aranjırovkamen jandy daýystaǵy ánder jıi shyrqalady, bul tutas el boıynsha biregeı format sanalady.

Radıostantsııanyń merekelik baǵdarlamasynda qyzyqty tok-shoýlar, shyǵarmashylyq kollaboratsııalar jáne árıne, zamanaýı otandyq mýzyka bar. Qańtardyń alǵashqy kúnderi Jibek Joly tyńdarmandary esh kútpegen shyǵarmashylyq jobaǵa qatysa alady. Bul — din, mýzyka jáne jýrnalıstıka salalarynyń ókilderin biriktirgen tok-shoý bolmaq: bir stýdııada Tóreǵalı Tóreáli, Nurlan ımam jáne Láılá Sultanqyzy bas qosady.

Jańa 2026 jylda «Jibek Joly» radıosy Open Air kontsertin ótkizýdi jáne tek qazaqstandyq estradanyń zamanaýı hıtterine ǵana emes, Ortalyq Azııa elderi men túrkitildes álem oryndaýshylarynyń ánderine negizdelgen mýzykalyq saıasatty jalǵastyrýdy kózdep otyr. Efırde qyrǵyz, ózbek, túrik jáne tatar ártisteriniń ánderi shyrqalyp, quttyqtaýlar aımaqtyń ártúrli tilderinde taratylady.

Jibek Joly radıosynyń negizgi aýdıtorııasy — 30-40 jastaǵy belsendi ári áleýmettik ómirge aralasatyn Astana turǵyndary. Olar saıasatty qadaǵalaıdy, mádenı oqıǵalarǵa qyzyǵady jáne jańa tolqynnyń zamanaýı mýzykasyn tańdaǵandy jón kóredi.

Buǵan deıin Jibek Joly arnasyndaǵy jańajyldyq telepremeralar jóninde jazǵan edik. Jańa jyl qarsańynda telearna arnaıy telebaǵdarlamalar ázirledi.