Jibek Joly efırindegi teledebatqa qatysýshylar pikirtalas alańyna jınala bastady
ASTANA. KAZINFORM — Dál qazirgi sátte Jibek Joly telearnasynda ótetin alǵashqy komandalyq televızııalyq debatqa qyzý daıyndyq júrip jatyr.
Debat qatysýshylary «Qazmedıa ortalyǵyna» jınala bastady. Olardy partııalastary qoldap, sáttilik tilep, pikirtalasta óz partııalarynyń ustanymyn laıyqty jetkizýge jiger berýge tyrysyp jatyr.
Bul teledebat Quryltaıdyń alǵashqy saılaýyna qatysýshy saıası partııalar arasyndaǵy pikirtalas alańdarynyń biri bolmaq. Taqyryp: «Zań men tártip — Ádiletti Qazaqstannyń negizi».
Efır barysynda taraptar ózekti máseleler boıynsha pikir bildirip, saılaýshylarǵa ózderiniń saıası ustanymdaryn tanystyrady.
Búgingi teledebattyń basty ereksheligi — pikirtalas komandalyq formatta ótedi, ıaǵnı ár saıası partııadan pikirtalas alańyna bir emes, eki spıkerden shyǵady.
11 tamyzda Jibek Joly telearnasynyń tikeleı efırinde jerebe tartý rásimi uıymdastyrylyp, saıası partııalar ókilderiniń búgingi teledebatta sóz sóıleý reti belgili bolǵan edi.
1. «Aq jol» partııasy — Bek-Muhamed Jáýkebaev, Ermek Ábildın;
2. Jalpyulttyq sotsıal-demokratııalyq partııasy — Larısa Lı, Nuraınash Kamalova;
3. «Ádilet» partııasy — Aıjan Aımaǵanova, Mádı Myrzaǵaraev;
4. Qazaqstannyń Halyq partııasy — Jandos Bıdaıbekov, Irına Smırnova;
5. «Aýyl» partııasy — Jazıra Sultanqulova, Erbolat Saýryqov;
6. «Baıtaq» partııasy — Amalbek Ómirtaı, Almat Turtaev;
7. Respublica partııasy — Oljas Quspekov, Dınara Shúkijanova.
Debatqa qatysatyndar ózderiniń partııasy nelikten qoldaýǵa laıyq ekenine saılaýshylardy sendirýi tıis.
Kórermen partııalar ókilderiniń ýájderin tyńdap, pikirtalasyna kýá bolady.
Bul turǵyda barlyq qatysýshyǵa teń múmkindik beriledi. Reglamenttiń saqtalýy da qatań baqylanady.
Aıta keteıik, teledebatty saǵat 20:00–de Jibek Joly telearnasynyń tikeleı efırinen, sondaı-aq telearnanyń resmı YouTube arnasynan kórýge bolady.
Efır barysynda debatqa qatysýshylarǵa WhatsApp arqyly saýal joldap, QR-kod arqyly baǵa berý múmkindigi bolady.
Eske salsaq, bıyl 1 shildede Memleket basshysy «Qazaqstan Respýblıkasy Quryltaıynyń saılaýyn taǵaıyndaý týraly» Jarlyqqa qol qoıdy. Saılaý 23 tamyzda ótedi.
QR Ortalyq saılaý komıssııasy Quryltaı saılaýyna qatysatyn 7 saıası partııanyń barlyǵynyń partııalyq tizimderin tirkedi. 145 depýtattyq mandatqa 545 kandıdat úmitker bolyp otyr.
