Jibek Joly arnasynda mereke qarsańynda «Tórletińiz» baǵdarlamasy efırge shyǵady
Kóktem merekesi qarsańynda efırin bastaıtyn jańa joba oıyn-saýyq, aqparatty-sazdy kóńil-kúı arqyly kórermenderdi el ishindegi talanttarmen, daryndy jandarmen jaqynyraq tanystyrady. Halyq eren tulǵalardyń ónerin tamashalaýǵa múmkindik alsa, ekinshi jaǵynan baǵdarlama qonaqtary bir ústel basynda otyryp, qoǵamdaǵy ózekti taqyryptardy talqylap, ózderiniń basynan ótken qyzyqty oqıǵalarymen, qupııalarymen bólisedi.
«Buny janǵa jylý syılaıtyn baǵdarlama dep atasa da bolady. Onda bizdiń súıip tyńdaıtyn ánderimiz, ulttyq salt-dástúrimiz, tarıhymyz týraly aıtylady. Al, keıipkerler negizinen búgingi kúnniń batyrlary men talantty ónerpazdary, daryndy tulǵalar bolmaq. Baǵdarlamaǵa tanymal adamdar ǵana emes, sonymen birge respýblıkanyń ár túkpirinen týma talanttar, daryndylar shaqyrylady. Olar sán, sport, estrada, teatr sııaqty san alýan salanyń kórnekti ókilderi. Biz bul jerde el ishine keń taraǵan ánder týraly kóbirek sóz qozǵaımyz. Sebebi, elimizde «áý demeıtin qazaq joq» dep tegin aıtpaıdy. Bizdiń ata-babalarymyz óner dese ishken asyn jerge qoıǵan, án bizdiń qanymyzda bar, ádet-ǵurypymyz ben dástúrimiz qandaı-da bir ánmen baılanysty. Buny halqymyzdyń biregeı kody desek te bolady», - deıdi joba dırektory Ǵalııa Baıbosynova.
Baǵdarlamadan aıtýly datalar men ulttyq jáne halyqaralyq mańyzǵa ıe merekeler de tys qalmaıdy. «Tórletińiz» baǵdarlamasy 8 naýryz kúni efırge shyǵady. Buny biz ádeıi Halyqaralyq áıelder kúnine arnadyq. Oǵan elge tanymal tulǵalar shaqyryldy. Sahnada otandyq estradada hıt bolǵan ánder shyrqalady. Jalpy baǵdarlama týraly tolyq ashyp, aıtqymyz kelmeıdi. Ázirge bul qupııa bolsyn. Anyǵy - kórermenderge keremet tosynsyı ázirlep jatyrmyz», - dep atap ótti rejısser.
Al jobanyń alǵashqy arnaýly shyǵarylymyn arna efırinen 8 naýryzda, keshki saǵat 21:15-te tamashalaýǵa bolady.
«Tórletińiz» sóziniń ózi qazaq halqy úshin qasterli uǵym. Biz qadirli qonaǵymyzdy tórge shyǵaryp, qurmet tanytamyz. Maǵan osy baǵdarlamany júrgizý usynylǵanda qýana kelistim. Sebebi jobanyń ıdeıasy tamasha. Osy habar arqyly kórermenderge umyt bola bastaǵan dástúrlerimiz ben ádet-ǵuryptarymyzdy eske salǵymyz keledi. Oǵan qosa, tanymal tarıhı tulǵalar jaıynda oı bólisemiz. Osylaısha kórermenmen birge ótken kúnderdi saǵynyshpen eske alamyz», - deıdi Láılá Sultanqyzy.
Aıta ketý kerek, baǵdarlama qonaqtary akterler, ánshiler, aqyndar, sýretshiler, kásipkerler, blogerler, modelder jáne buqaralyq aqparat quralynyń ókilderi. Olar kórermenderge súıikti isi men kásibi týraly aıtyp, josparlarymen bólisedi. Ómirinde bolyp jatqan jańalyqtaryn da aıtyp bermek. Habar barysynda qonaqtardyń jeke muraǵattarynan fotosýretter men beınetúsirilimder kórsetiledi. Baǵdarlama meımandary telejúrgizýshilermen qatar, óz jankúıerleriniń suraqtaryna da jaýap beredi. Al jobanyń basty erekshelikteriniń biri baǵdarlamadaǵy qonaqtar tek aıtýly tulǵalar ǵana emes, elimizdiń qarapaıym azamattary, olar bir ústel basynda tanymal adamdarmen birge otyryp, áńgimelesedi.
«Tórletińiz» jobasy Jibek Joly telearnasynan keshke qazaq jáne orys tilderinde kórsetiledi. Baǵdarlamany ár senbi saıyn Jibek Joly arnasynan keshki saǵat 21:00-de tamashalaı alasyzdar.
