Jibek Joly arnasynda Qydyráli men Qaraqattyń «Jaqsy adamdarym» benefıs-shoýy efırge shyǵady
Baǵdarlamany elimizdegi tanymal estrada juldyzdary Qydyráli Bolman men Qaraqat Ábildına júrgizedi.
Benıfıs-shoýdyń alǵashqy qonaǵy - Qazaqstannyń halyq ártisi, ańyz adam, áıgili akter Asanáli Áshimov.
«Jibek Joly» arnasynan kórermenge jol tartqaly turǵan baǵdarlama meniń repertýarymdaǵy qazaqqa keńinen tanylǵan «Jaqsy adamdarym» atty áninen negiz alyp tur dep oılaımyn. Arna basshylyǵy men prodıýser baǵdarlama tizginin bizge senip tapsyrǵanan keıin júktelgen jaýapkershilik mol. Qydyráli ekeýimiz kórermen kóńilinen barynsha shyǵýǵa tyrysamyz. Baǵdarlamanyń alǵashqy keıipkeri – KSRO, QazKSR, Qazaqstannyń halyq ártisi, Memlekettik syılyqtyń laýreaty Asanáli Áshimov. Ańyz, abyz adamnyń aıtary kóp», - dedi Qaraqat Ábildına túsirilim aldynda.
Kórermen baǵdarlamadan halyqqa tanymal adamdardyń ómirin, eńbegin, shyǵarmashylyǵyn tanı túsip, buryn-sońdy aıtylmaǵan qyr-syryn da bile alady.
«Habardyń qurylymyna keler bolsaq, bizde bas keıipker bolady jáne onyń aınalasynda iri tulǵalar bar. Stýdııada sol kisilerdiń basyn qosyp, júrgizýshiler ádemi áńgime órbitedi»,- deıdi benefıs-shoý prodıýseri Meıramgúl Mádáli.
«Jaqsy adamdarym» osy senbi, 1 qazanda keshki 22:30-da efırge shyǵady.
