Jibek Joly arnasynan Prezıdent teleradıokesheniniń «Qańtar oqıǵasy. Bir jyl» derekti fılmi kórsetiledi

ASTANA. QazAqparat – Búgin «Jibek Joly» telearnasy Qazaqstan Respýblıkasy Prezıdentiniń Teleradıokesheniniń jańa derekti fılmin kórsetedi. Derekti fılm el úshin teńdesi joq synaqqa aınalǵan qańtar oqıǵasyna arnalǵan, dep habarlaıdy QazAqparat tilshisi.

Fılmde qańtar oqıǵasynyń hronologııasy, jaǵdaıdyń beıbit sherýden bastalyp, jappaı tártipsizdikke ulasý sebebi men turǵyndardy qalaı, kimder arandatqany týraly baıandalady.

Vıdeodan alynǵan kadr

Sonymen qatar, derekti fılmde buǵan deıin jarııalanbaǵan málimetter, oqıǵa kýágerleri men sol kúnderi jappaı tártipsizdikke qatysyp, jaza arqalaǵan adamdardyń eksklıýzıv suhbattary qamtylǵan.

Foto: Zakon.kz

Bas prokýratýra qańtar oqıǵasyndaǵy qylmysty úshke bólip qarastyryp, taldaý jasaǵan. Quzyrly organ málimetine qaraǵanda, 1600-den asa azamat kúdikti dep tanyldy. Onyń ishinde 1312 adamnyń isi tergelip, búginde sotqa joldanǵan. Qańtar oqıǵasyn uıymdastyrýshylardyń qylmystyq isteri áli zerdelenip jatyr. Keıbirine qatysty qylmystyq ister sotta jabyq esik jaǵdaıynda qaralýda.

Vıdeodan alynǵan kadr

Úkimet bir jyl ishinde bızneske kelgen shyǵyndy ótedi. Búlingen ǵımarattar bútindelip jatyr. Alaıda, sol kezderi urlanǵan qarýlar tolyq tabylǵan joq. Derekti fılmde ishki ister organdarynyń qarýlardy izdestirý baǵytynda atqaryp jatqan jumystary da jan-jaqty baıandalady.

Foto: Zakon.kz

QR Prezıdentiniń teleradıokesheni usynatyn «Qańtar oqıǵasy. Bir jyl» derekti fılmi Jibek Joly telearnasynyń efırinen búgin, 5 qańtarda saǵat 20.30-da kórsetiledi.

Eske salaıyq, buǵan deıin 4 qańtarda Jibek Joly telearnasy «Bárin ózgertken Qantar» derekti fılmin kórsetken bolatyn. Kartınany Qazaqstan Respýblıkasy Prezıdentiniń Teleradıokesheniniń Youtube-tegi resmı arnasynan kórýge bolady.

Basty sýret: Ýstınka LIVE