Jibek Joly arnasynan Láılá Sultanqyzynyń «Ana bolǵym keledi» baǵdarlamasy efırge shyqty

ASTANA. QazAqparat - Bıyldan bastan «Jibek joly» telearnasynyń efırinen Láılá Sultanqyzynyń avtorlyq jobasy - «Ana bolǵym keledi» baǵdarlamasy efırge jol tartty, dep habarlaıdy QazAqparat.

Alǵashynda qaıyrymdylyq-áleýmettik baǵyttaǵy telejoba bedeýlik dertine shaldyqqan erli-zaıyptylarǵa kómek kórsetý maqsatynda byltyr Láılá Sultanqyzynyń Instagram áleýmettik jelisinde bastalǵan bolatyn.

Bul bastamaǵa túrli sebeptermen «Ańsaǵan sábı» memlekettik kvotasyna iline almaǵan (genetıkalyq aýytqý, jasynyń úlkendigi, AMG mólsheriniń tómendigi jáne t.b. sebepterge baılanysty) sábıli bolýdy armandap júrgen otbasylar tańdap alynǵan bolatyn.

Elimizde EKU baǵdarlamasyn jasatýdyń ortasha quny - 2 mln teńge. Bundaı kólemdegi qarajatty jınaýǵa Láılá Sultanqyzynyń oqyrmandary men qaıyrymdy jandar kómek kórsetken edi.

Osy jobaǵa qatysqan qyzylordalyq Aınur esimdi besinshi patsıent júkti bolyp, jaqynda sábıin ómirge ákeldi.

«Ana bolǵym keledi» jobasynyń alǵashqy maýsymynda taǵy da qaıyrymdy jandardyń kómegimen alty patsıent EKU baǵdarlamaǵa tańdap alyndy.

Búginde joba aıasynda jalpy sany 11 jup EKU baǵdarlamasynan ótip jatyr. Jyl sońyna deıin bul kórsetkishti 20-ǵa deıin jetkizý josparda bar.

Osy ýaqytqa deıin 3 áıel bala kóterdi. Bunyń ózi - medıtsınalyq jáne shyǵarmashylyq top úshin úlken jetistik.

Joba patsıentteri elimizdiń Almaty, Astana, Taraz, Aqtaý, Pavlodar, Qaraǵandy, Aqtóbe, Óskemen óńirlerinen kelip, myqty mamandardyń baqylaýynda.

Jańa televızııalyq maýsymda «Ana bolǵym keledi» jobasynyń shyǵarmashylyq ujymy patsıentterdiń ata-ana ataný jolyndaǵy kúresine, úmitine, keı kezde sátsiz sátterine de kýáger bolyp, olardyń jaqsylyqtyryna ortaqtasyp, kórermennen súıinshi suraıtyn kúndi de asyǵa kútedi.