Jibek Joly arnasynda alǵashqy komandalyq televızııalyq debat bastaldy
ASTANA. KAZINFORM — Jibek Joly telearnasynyń tikeleı efırinde birinshi tarıhı Quryltaı depýtattaryn saılaýǵa qatysatyn jeti saıası partııanyń ókilderi pikirtalasty bastady.
Saıası partııalardyń ókilderi osymen úshinshi iri alańda pikir talastyrady. Buǵan deıin saıası dıalog eki respýblıkalyq telearnada uıymdastyrylǵan bolatyn. Bul jolǵy erekshelik — pikirtalas komandalyq formatta ótedi, ıaǵnı ár partııa 2 spıkerden shyǵardy.
«Zań men tártip — Ádiletti Qazaqstannyń negizi» — debatqa qatysýshylar osy taqyryptyń tóńireginde sóıleıdi. Azamattardyń quqyǵy men qaýipsizdigi, zańnyń ústemdigi, ıaǵnı turaqty damý men ádiletti qoǵam qurýdyń berik negizine qatysty óz ustanymdaryn bildirip, suraqtarǵa jaýap beredi.
Suraqty debatqa qatysýshylar ǵana emes, arnaýly WhatsApp nómiri arqyly kórermen de qoıa alady. Kórermende teledebatqa qatysyp jatqan partııa ókilderine baǵa berý múmkindigi de bolady. Atap aıtqanda, QR-kod arqyly Qazaqstandyq qoǵamdyq damý ınstıtýtynyń saýalnamasyna qatysa alady. Eskere ketetin jaıt, bul saýalnama nátıjesi — saıası partııalarǵa berilgen jalpy baǵa emes. Naqty teledebatqa qatysyp jatqan partııa ókilderiniń belsendiligi men jaýaby ǵana baǵalanady.
Teledebat 4 raýndtan turady jáne belgilengen reglamenttiń saqtalýy qatań baqylanady. Birinshi kezeńde spıkerler partııanyń negizgi basymdyqtary men naqty usynystaryn tanystyrady. Ekinshi kezeńde kórermen men jýrnalıster saýaldaryna jaýap beredi. Úshinshi kezeńde ár partııa óz tańdaýy boıynsha kez kelgen bir partııaǵa suraq qoıa alady. Al kelesi sheshýshi kezeńde árbir partııa ókili Quryltaıǵa saılanǵan jaǵdaıda naqty ne isteıtinin, qandaı ýáde beretinin aıtady.
Buǵan deıin habarlanǵandaı, 11 tamyzda Jibek Joly telearnasynyń tikeleı efırinde saıası partııalar arasyndaǵy saılaýaldy teledebat aldyndaǵy jerebe tartý rásimi uıymdastyrylyp, partııa ókilderiniń sóz sóıleý reti belgili boldy.
1. «Aq jol» partııasy — Bek-Muhamed Jáýkebaev, Ermek Ábildın;
2. Jalpyulttyq sotsıal-demokratııalyq partııasy — Larısa Lı, Nuraınash Kamalova;
3. «Ádilet» partııasy — Aıjan Aımaǵanova, Mádı Myrzaǵaraev;
4. Qazaqstannyń Halyq partııasy — Jandos Bıdaıbekov, Irına Smırnova;
5. «Aýyl» partııasy — Jazıra Sultanqulova, Erbolat Saýryqov;
6. «Baıtaq» partııasy — Amalbek Ómirtaı, Almat Turtaev;
7. Respublica partııasy — Oljas Quspekov, Dınara Shúkijanova.
Aıta keteıik, teledebatty saǵat 20:00–de Jibek Joly telearnasynyń tikeleı efırinen, sondaı-aq telearnanyń resmı YouTube arnasynan kórýge bolady.
Eske salsaq, bıyl 1 shildede Memleket basshysy «Qazaqstan Respýblıkasy Quryltaıynyń saılaýyn taǵaıyndaý týraly» Jarlyqqa qol qoıdy. Saılaý 23 tamyzda ótedi.
QR Ortalyq saılaý komıssııasy Quryltaı saılaýyna qatysatyn 7 saıası partııanyń barlyǵynyń partııalyq tizimderin tirkedi. 145 depýtattyq mandatqa 545 kandıdat úmitker bolyp otyr.
