Jibek Joly arnasy Parıj Olımpıadasynan habar taratýǵa tas-túıin daıyn
ASTANA. KAZINFORM — Jibek Joly telearnasy tórtkúl dúnıe asyǵa kútken Parıj Olımpıadasynan tikeleı efırde habar taratýǵa saqadaı saı. Telearna ujymy dál qazir dúbirli dodanyń ashylý saltanatyn qalyń kórermen nazaryna usynbaq.
Jibek Joly telearnasy úshin Parıj Olımpıadasyn tikeleı efırden kórsetý — tarıhı oqıǵa. Bul rette ár qyzmetker ózine júktelgen mańyzdy mıssııanyń jaýapkershiligin sezinip otyr.
Parıj Olımpıadasynyń ashylý saltanatyna oraı stýdııaǵa sport salasynyń jiligin shaǵyp, maıyn ishken mamandar kelip, oılaryn ortaǵa saldy.
Sıdneı Olımpıada oıyndarynyń kúmis júldegeri, dańqty palýan Islam Baıramýkov kútpegen jerden qorjynǵa júldeler túsýi múmkin ekenin atap ótti.
«Olımpıadanyń qyzyǵy sol, myqtylar kósh sońynda qalyp, tasadaǵy sportshylar top jaryp ketýi ǵajap emes. „Baq shaba ma, bap shaba ma?“ degen sóz osyndaı dúbirli dodalarda aıtylsa kerek. Árıne, eshkim utylamyn dep kelmeıdi. Bári baryn salady. Osy rette, otandastarymyzdyń Olımpıadaǵa daıyndyq jumystaryn oıdaǵydaı júrgizgenin kóz kórdi. ıAǵnı, júldeden bári dámeli. Dese de, dzıýdoshylar Eldos Smetov pen Ábıba Abýjaqynovaǵa senimmen qaraıtyndar kóp. Qala berdi, balýandar, boksshylar, oq atý sportynyń saıypqyrandary el qorjynyna júlde salady degen senim mol», — dedi Islam Baıramýkov.
Tórt jylda bir keletin mańyzdy jarysty teledıdardan tamashalaý bir bólek, kommentator retinde aqparat taratý odan da mańyzdy ekeni anyq.
Osy oraıda stýdııaǵa kelgen elimizge tanymal kommentatorlar — Raýan Oqas pen Dıdar Qadyrov óz tájirıbesine súıenip, Parıj Olımpıadasynan ne kútetinin aıtyp berdi.
«Olımpıadany saǵyna kúttik. Tokıo Olımpıadasymen salystyrǵanda joǵary nátıjelerge qol jetkizemiz degen oıdamyn. Japonııa elinde ótken dúbirli dodada tek 7 qolamen shektelgenimiz belgili. Bul joly qorjynǵa bir-eki altyn túsýi tıis. Bireýi bokstan bolady-aý dep boljap otyrmyn. Jalpy, balyq sportshynyń júlde alýǵa úmiti zor. Olımpıadada baq kerek. Saıası máseleler, tóreshilerdiń jónsiz áreketteri kıligip ketpese sportshylardyń barlyǵynyń júldeden dámesi bar. Rybakınanyń jarystan tys qalǵanyna asa ókinish joq. Sebebi, Parıjdegi tósenishte onyń júlde alatyny ekitalaı edi. Balýandarǵa kelsek, Álisher Erǵalı kem degende qola medalǵa qol jetkizedi degen oıdamyn. Sondaı-aq, Azamat Dáýletbekovtiń de az-maz múmkindigi bar. Jalpy, bul qurama barlyq Olımpıadaǵy eń myqty quram deýge tolyq negiz bar», — dedi Raýan Oqas.
Buǵan deıin Raýan Oqas Sochı jáne Tokıo Olımpıadasynda kommentator bolyp sport súıer qaýymǵa qyzyqty aqparat usynǵanyn atap ótken jón.
Áriptesi Dıdar Qadyrov Parıj Olımpıadasynda sporttyq rýhpen qatar, ozyq mádenıettiń, órkenıettiń aýrasy seziletinin aıtady.
«Parıj Olımpıadasy aýqymdy sporttyq shara retinde jurt nazaryn aýdaryp otyr. Saıystyń barlyǵy shahardyń syrtqy aýmaǵynda uıymdastyrylýynyń da ózindik ereksheligi bar. Jarystyń ashylýy saltanatynda, oıyndar barysynda frantsýz halqynyń baı mádenı murasy pash etiledi», — dedi Dıdar Qadyrov.
Aıta keteıik, Jibek Joly telearnasy elorda ákimdiginiń qoldaýymen Parıj Olımpıadasynyń ashylý saltanatyn ortalyq saıabaqta tikeleı efırde kópshiliktiń nazaryna usynady.
Saltanatty shara aıasynda kontsert te ótedi.
Esterińizge salsaq, buǵan deıin Jibek Joly telearnasy Olımpıada oıyndarynyń birqataryn tikeleı efırde kórsetetinin jazǵan edik.
