Jeju Air apatynan qaza bolǵan 179 adamnyń týystary sheneýnikterdiń ústinen shaǵym túsirdi

ASTANA. KAZINFORM – Qaza tapqandardyń týystary Ońtústik Koreıa tarıhyndaǵy eń aýyr áýe apatyna ákelgen salǵyrttyqty tergeýdi talap etip otyr, dep habarlaıdy BBC.

Ótken jyldyń jeltoqsan aıynda Jeju Air ushaǵy apatynda qaza tapqandardyń týystary 15 sheneýniktiń ústinen shaǵym túsirdi. Olardyń arasynda Ońtústik Koreıanyń kólik mınıstri men áýe kompanııasynyń bas dırektory bar.

Talapkerlerdiń pikirinshe, qaıǵyly oqıǵa qylmystyq nemquraıdylyq saldarynan bolǵan. 

Endi qaza tapqan 72 adamnyń týystary apattyń sebebin muqııat tekserýdi talap etip, bul jaı ǵana jazataıym oqıǵa emes, «basqarýdaǵy salǵyrttyq jáne aldyn alýǵa bolatyn táýekelderdi elemeýden týyndaǵan aýqymdy azamattyq apat» bolǵanyn aıtyp otyr. 

Bes aıǵa jýyq ýaqyt ótti, biraq bılik ushaqtyń Mýan áýejaıyna shuǵyl qonýy men odan keıingi órttiń yqtımal sebepterin áli de saraptap jatyr. 

Qylmystyq is sońǵy shaǵym túskenge deıin qozǵaldy, Jeju Air bas dırektory Kım I-bege elden shyǵýǵa tyıym salyndy. Olaı bolǵanymen, búgingi kúnge deıin eshkimge aıyp taǵylǵan joq.

Ústinen shaǵym túsirilgen 15 adamnyń ishinde memlekettik qyzmetkerler, áýe kompanııasynyń qyzmetkerleri jáne aerodrom aımaǵynda qurylys, tehnıkalyq qyzmet kórsetý, qadaǵalaý jáne qustardy baqylaýǵa jaýapty áýejaı qyzmetkerleri bar. 

Seısenbi kúni túsirilgen shaǵym apattyń mán-jaıy týraly suraqtardy qozǵap otyr. 

Eske sala ketsek, Ońtústik Koreıadaǵy ushaq apatynan borttaǵy 181 adamnyń 179-y mert boldy.