«JCI» akkredıtatsııasynyń standarttary medıtsınalyq qyzmetterdiń sapasyn jaqsartýǵa múmkindik beredi
ASTANA. 10 sáýir QazAqparat - Ana men bala ulttyq ǵylymı ortalyǵy damyǵan elderdegi aýrýhanalardyń sapasy men naýqastardyń qaýipsizdik deńgeıine beriletin «altyn standart» - «Joint Commission International (JCI)» halyqaralyq standartyn alǵan Qazaqstandaǵy alǵashqy medıtsınalyq uıym atandy.
«JCI» akkredıtatsııasynyń standarttary kórsetiletin medıtsınalyq qyzmetterdiń sapasyn jaqsartýǵa múmkindik beredi, dep habarlady «Ana men bala ulttyq medtsınalyq ortalyǵy» AQ naýqastardyń qaýipsizdigi men sapany baǵalaý bóliminiń bastyǵy Aınur Aıyphanova rm.kz saıtyna bergen suhbatynda.
«Bul standarttardyń biregeıligi - retteý salasy óte keń densaýlyq saqtaý uıymdaryna eseptelgendiginde. Álem boıynsha osy standartty alǵan 400-ge jýyq uıym bar, solardyń qataryna Qazaqstannan alǵash ret Ana men bala ulttyq medıtsınalyq ortalyǵy qosyldy», - dedi A.Aıyphanova.
Onyń atap ótkenindeı, «JCI» standarty Qazaqstannyń álemdik joǵary mamandandyrylǵan medıtsınalyq qyzmetter naryǵyna jasaǵan serpini boldy.
«JCI» akkredıtatsııasy nemese sertıfıkatyn alǵan aýrýhanalarda aqyly qyzmet alatyn naýqastar men medıtsınalyq týrısterdiń legi birden artady. Eń aldymen bul standart naýqastardy jaqsy emdeýdi, emdeý sapasyn arttyrýdy, aýrýhanadaǵy qaýipsizdik pen naýqastardyń jaılylyǵyn uıymdastyrýdy kózdeıdi», - dep atap ótti A.Aıyphanova.
