Jas Qazaq: Býrabaıda shetelde turatyn qazaq balalaryna arnalǵan etnolager ashyldy

BÝRABAI. KAZINFORM – Býrabaıda sheteldegi qazaq balalaryna arnalǵan jazǵy lager ashyldy. Munda qazaq tili, tarıhy, ulttyq oıyndar úıretiledi. Jas Qazaq lagerin «Otandastar» qory uıymdastyryp otyr.

Bıyl bul lagerde AQSh, Túrkııa, Polsha, Reseı, Mońǵolııa, Ózbekstan, Qyrǵyzstan jáne Qytaıdan kelgen etnıkalyq qazaq balalary demalady. Olardyń bári qor uıymdastyrǵan túrli baıqaýlardyń jeńimpazy.

- Bul «Otandastar» qoryndaǵy erekshe jobalardyń biri. Jas Qazaq etnolageri bıyl 5-shi ret ótkizilip jatyr. Munda balalar demalyp qana qoımaıdy. Bul sheteldegi qazaq balalary tarıhı otanyna kelip, rýhanı mádenıetin júrekpen sezetin alyp saparlardyń biri. Balalar qazaq tilin, tarıhyn, ádebıetin, salt-dástúrin tereńirek oqyp, tanysady, – deıdi Jibek Joly telearnasynyń «Búgin LIVE» baǵdarlamasyna onlaın suhbat bergen «Otandastar» qorynyń vıtse-prezıdenti Álibek Jurqadam.

Uıymdastyrýshylar bolashaqta jobany budan da aýqymdy etip ótkizýdi josparlap otyr.

- Buǵan deıin shamamen 700-den asa bala qatysty. Al búgin 130 bala qatysyp otyr. Munda álemniń 9 elinen etnıkalyq qazaq balalary keldi. Lager 7 shilde kúni bastalyp, 20 shildege deıin jalǵasady. Osy aralyqta balalarǵa dombyradan sabaqtar ótkiziledi, túrli baıqaýlar uıymdastyrylady. Bul is-sharany jyl saıyn uıymdastyrýdy josparlap otyrmyz. Aldaǵy ýaqytta balalardyń sanyn arttyrǵymyz keledi. Qosymsha qarjylandyratyn bolsa, jobany úlkeıtý maqsatymyz bar. Óıtkeni bul óte qajetti shara, – deıdi qordyń vıtse-prezıdenti.

Aıta keteıik, birneshe kún buryn Tólebı aýdanynda balalardy jazǵy saýyqtyrýǵa arnalǵan modýldi lager ashylǵan edi.