Jaguar Land Rover satylymy AQSh tarıfi men kıbershabýyl saldarynan kúrt tómendedi

ASTANA.KAZINFORM — Avtokontsern toqsan boıynsha tolyq qarjylyq nátıjelerin aqpan aıynda jarııalaıdy, dep habarlaıdy Kazinform agenttiginiń menshikti tilshisi. 

Ótken jyldyń sońǵy toqsanynda brıtandyq Jaguar Land Rover avtokólik óndirýshisiniń satylymy AQSh-ta engizilgen tarıf pen aýqymdy kıbershabýyldan keıingi qalpyna kelý protsesiniń sozylýyna baılanysty kúrt qysqardy.

Kompanııa habarlamasyna sáıkes, qazan–jeltoqsan aılarynda dılerlik jeli arqyly kóterme jetkizilimder 43,3%-ǵa azaıyp, 59,2 myń avtomobıl boldy. Al bólshek saýdadaǵy satylym 25,1%-ǵa tómendep, 79,6 myń kólikke jetti. Nátıjelerge tamyz aıynyń sońynda bolǵan kıbershabýyl eleýli teris áser etti.

Kıberıntsıdent saldarynan Jaguar Land Rover qyrkúıek aıynda Ulybrıtanııa, Slovakııa, Brazılııa jáne Úndistandaǵy kásiporyndarynda óndiristi ýaqytsha toqtatýǵa májbúr boldy. Bul toqsandyq shyǵynnyń shamamen 500 mln fýnt sterlıngke jetýine alyp keldi, dep jazady brıtandyq The Guardian basylymy.

Ulybrıtanııadaǵy eń iri avtokontsernniń óndiristik qýattary qalypty jumys rejımine tek qarasha aıynyń ortasynda ǵana shyqty. Budan keıin kompanııaǵa jahandyq jetkizilimderdi qalpyna keltirý úshin qosymsha ýaqyt qajet boldy.

Qarjylyq kórsetkishterge AQSh-tyń jańa ımporttyq baj salyǵy da áser etti. Sonyń saldarynan Jaguar Land Rover-diń Soltústik Amerıka naryǵyndaǵy úlesi qysqardy: bul óńirde bólshek saýdadaǵy satylymdar shamamen 40%-ǵa, al kóterme jetkizilimder 65%-ǵa jýyq azaıdy.

Jalpy satylym kóleminiń shamamen tórtten úshi (74,3%) Range Rover, Range Rover Sport jáne Defender modelderine tıesili boldy. Jaguar Land Rover úndistandyq Tata Motors ónerkásiptik konglomeratynyń quramyna kiredi.

Buǵan deıin Qazaqstanda avtokólik óndirisiniń 25,5%-ǵa artqany, sondaı-aq 2026 jyly eldegi avtokólik baǵasy qandaı bolatyny jáne nelikten qazaqstandyqtar eski kólikterin ázirge ýtılızatsııaǵa tapsyra almaı otyrǵany týraly habarlanǵan bolatyn. 

Sonymen qatar Sklıar ýtılalym aqshasyn orman tehnıkasyn satyp alýǵa paıyzsyz berý usynysyn qoldamaǵan edi.